Qazaqtyń Sport jáne týrızm akademııasy ǵımaratynda ótip jatqan jıyn barysynda álemdik deńgeıdegi sarapshylar joǵary nátıjelerge qol jetkizý úshin kóptegen sport túri ókilderiniń qoldanyp júrgen biregeı tájirıbeleri men ádisterdi tanystyrady. Salmaq qýýdan keıin sportshynyń qaıta qalypa kelýi, jaraqattanýdyń aldyn alý, rejım saqtaý men ár jarystan soń ońaltý prosessiniń qalaı júrgizý qajet jáne sol sekildi taǵy basqa keleli máseleler boıynsha keńinen áńgime qozǵaldy. Osy salada eńbek etip júrgen travmatolog, ortoped, reabılıtolog, farmakolog, nýtrısıolog jáne dıetolog mamandary, ǵylymı qyzmetkerler, bapkerler men sportshylar tarapynan túıdek-túıdek oılar aıtyldy.
«Qazaqstannyń sportty zamanaýı talaptaryna saı damýy úshin osyndaı jıyndardyń jıi uıymdastyrý qajet. Qazirgi kezde sport bir ornynda turǵan joq. Ol únemi damý ústinde. Medısına da dál sol sekildi. Sol sebepti de biz osy ınfraqurylymǵa kiretin barlyq ınstıtýttardy qalyptastyryp, eldegi sportshylardy qoldaý júıesin barynsha damytýymyz kerek. Al ol úshin medısına salasy boıynsha myqty mamandar daıarlap, olardyń biliktiligin únemi jetildirip otyrýymyz qajet. Búgingi tańda medısınasyz sport alǵa jyljymaıdy. Sony bir sátke de qaperden shyǵarýǵa bolmaıdy», dedi sporttyq medısına jáne ońalý ortalyǵynyń dırektory Azamat Nurmatov.
Sondaı-aq osy jıyn barysynda qazaqstandyq Meıirbek Kólbaev, reseılik Maksım Nıkıtın, ırandyq Ramın Amırsasan, belarýssııalyq Evgenıı Akımov, úndistandyq Aashısh Chaýdhrı jáne taǵy basqa óz salasynyń bilgir mamandary baıandama jasady. Atalǵan shara 22 jeltoqsanǵa deıin sozylady.
