Mektep jasynan sportqa etene jaqyn bolǵan Dına túrli jarystarda el namysyn abyroıly qorǵap, qazirgi kezde qalyń qazaq jankúıerleriniń qoshemetine bólenip júr. Solardyń arasyndaǵy eń eleýlisi – 2019 jyly AQSh-tyń Gavaı shtatyndaǵy Kaılýa-Kona qalasynda trıatlonnan áýesqoılar arasynda ótken álem chempıonatyna («Ironman») qatysýy. Sporttyq bul túrinde atalǵan jarysta júldegerler sanatynan kóriný bylaı tursyn, joldama alýdyń ózi ońaı sharýa emes. Osy jaıttyń ózinen-aq keıipkerimizdiń qandaı aýyr synaqtardan ótkenin ańǵartsa kerek.
Dına Shaımerdenovanyń basqa da aýyz toltyryp aıtarlyqtaı tabystary az emes. Bıylǵy jyldyń ózinde ǵana ol BAÁ-de uıymdastyrylǵan «Ironman 70.3 Dubai» dodasynda kúmis medaldi ıelense, Ázerbaıjanda tusaýy kesilgen «IronWind 70.3» týrnırinde bas júldeni oljalady. Sonymen qatar elordada jalaýy jelbiregen «IRONMAN 70.3 Astana» jarysynyń absolıýtti saıysynda úshinshi orynǵa taban tiredi. Al taıaýda ǵana Dına AQSh-tyń Iýta shtatyndaǵy Sent-Djordj qalasynda jalaýy jelbirgen álem chempıonatynda («Ironman 70.3») qola medaldi moınynda jarqyratty. Tórtkúl dúnıeniń myqtylar jınalǵan jarysta buǵan deıin ataqty veloshabandoz, Olımpııa oıyndarynyń jeńimpazy Aleksandr Vınokýrov qana jeńis tuǵyryna kóterilgen edi. Osylaısha, Shaımerdenova óz esimin osyndaı dárejege jetken Qazaqstannyń tuńǵysh trıatlonshy qyzy retinde sporttyq shejirege tirkedi.
Negizi Dına kásipqoı sportshy emes. Onyń eki joǵary bilimi bar. Sóz oraıy kelgende, 2021 jyly Shaımerdenovanyń «Eren eńbegi úshin» medalimen marapattalǵanyn aıta ketken abzal. Ol qarjy salasy boıynsha basshylyq qyzmetter atqara júrip, sportty da serik etýde. Al trıatlonǵa den qoıǵanyna bar-joǵy jeti jyldaı ǵana ýaqyt boldy. Soǵan qaramastan, Dına Saıanqyzy halyqaralyq arenada óziniń myqtylyǵyn moıyndatyp úlgerdi. Mine, «tektiden tekti týady» dep osyndaı da aıtylsa kerek.
Dına óziniń ár sózinde ákesi Saıan Shaımerdenovtyń onyń júregine bala kezinen sport pen salamatty ómir saltyna degen súıispenshiliktiń dińgegin qalap ketkenin aıtady. Iá, bul esim jankúıerlerge jaqsy tanys. Kezinde syrminez Saıannyń ónerine súısinbegen jankúıer joq-aý, sári! Kógaldaǵy hokkeıdiń has sheberi bolǵan ol Almatynyń dańqty «Dınamosynyń» namysyn abyroıly qorǵap, segiz dúrkin KSRO chempıony atandy, eki ret kúmiske qol sozdy. Eýropa chempıondary kýbogyn ıelenip, basqa da asa baıraqty básekelerde jeńis tuǵyryna kóterildi. О́tken ǵasyrdyń jetpisinshi jáne sekseninshi jyldary Keńes Odaǵynyń eń myqty oıynshylarynyń biri ári biregeıi bolǵan Saıan Safýanulynyń «Halyqaralyq dárejedegi sport sheberi» degen ataǵy bar. Keıinnen bapkerlikke den qoıyp, Qazaqstan Respýblıkasynyń eńbek sińirgen jattyqtyrýshysy jáne elimizdiń kógaldaǵy hokkeı federasııasynyń prezıdenti qyzmetterin atqardy. Sonymen qatar Dınanyń ósip-ónip, el erteńin oılaıtyn azamatsha bolyp qalyptasýyna atasy – Halyq jazýshysy, Qazaqstannyń Memlekettik syılyǵynyń laýreaty, «Otan» ordeniniń ıegeri Safýan Shaımerdenov te mańyzdy ról atqardy.
Atasynyń qazaq ádebıetindegi jáne ákesiniń otandyq sporttaǵy jetistikteri Dınany árkez jarqyn jeńisterge jetelep, únemi shabyttandyryp otyrady.
«Asyl atamnyń júrip ótken jolyna qarap, men adaldyq pen ádildik, izgilik pen janashyrlyq, jaýapkershilik jáne taǵy basqa kóptegen adamı qasıetterdi boıyma sińirdim. Aldyma bıik maqsat qoıyp, soǵan jetý úshin tynbaı eńbek etýdi úırendim. Otanymdy, elim men jerimdi súıýdiń mańyzdylyǵyn tereń uǵyndym. Atam men ákemniń ómirlik qaǵıdattary men ustanǵan prınsıpteri bul kúnderi maǵan jumysta da, sportta da kóp kómek berýde», deıdi Dına.
Jýyrda ǵana AQSh-tyń Iýta shtatyndaǵy Sent-Djordj qalasynda ótken álem chempıonatyndaǵy («Ironman 70.3») óziniń jarqyn jeńisin Dına Saıanqyzy atasy, Halyq jazýshysy Safýn Shaımerdenovtyń 100 jyldyq mereıtoıyna arnady.
