Kezdesý barysynda Erlan Qoshanov «Amanat» qataryna 800 myńnan astam qazaqstandyqty biriktire otyryp, jańa jaǵdaıda óziniń kóshbasshylyǵyn saqtap qalǵanyn atap ótti.
«Bul sheshimdi árqaısyńyz oılanyp, tolǵanyp, júrekten ótkizip baryp qabyldady dep oılaımyn. О́ıtkeni bul – úlken senim ári zor jaýapkershilik. Bizdiń múddemiz bir, maqsatymyz bir. Ol – eldegi turaqtylyqty saqtaý, Táýelsizdigimizdi nyǵaıtý, ultty biriktirý. Qoǵamdy Memleket basshysynyń tóńiregine toptastyrý. Bul jolda bárimiz bir kisideı jumylýymyz kerek», – dedi Erlan Qoshanov.
Sondaı-aq «Amanat» tóraǵasy bıyl partııa aýqymdy jańǵyrtýdan ótkenin atap ótti. Atap aıtqanda, partııanyń jańa saıası tuǵyrnamasy bekitildi, onda memlekettiń basty baılyǵy adam ekendigi naqty kórsetilgen. Belsendi azamattyq ustanymdy qalyptastyrýǵa, áleýmettik ádilettilikti qamtamasyz etýge, barlyq azamat úshin teń múmkindik jasaýǵa, jasampaz eńbek ıdeıasyn ilgeriletýge baǵyttalǵan jáne t.b. birqatar partııalyq joba men bastama iske asyrylýda.
Búgin partııa qataryna osy jyldyń mamyr aıynda terezeden qulaıyn dep turǵan 3 jasar balany aman alyp qalǵan Sábıt Shontaqbaev pen shilde aıynda janyp jatqan ǵımarattyń tóbesinen Memlekettik Eltańba men Týdy alyp shyqqan Muhamed Qanseıit qosyldy.
Sonymen qatar «Amanat»-qa qabyldanǵandardyń qatarynda volonter Arıana Belobjıskaıa, «Sensitive» estimeıtin bıshiler teatrynyń ártisi Aınur Saınova, ánshi Qanat Úmbetov, metallýrg Nıkıta Ekel, KAZGIýÝ Ýnıversıteti Basqarma tóraǵasynyń orynbasary Aınur Káribozova, prodıýser Aısáýle Ábilda, ánshi Qaraqat Ábildına jáne mýzykalyq prodıýser Qydyráli Bolmanov, jýrnalıster Darhan Ábdiýahıt, Meıramgúl Mádáli bar.
Sondaı-aq partııaǵa hırýrg Oljas Janaly, muǵalim Jadyra Shábden, aktrısa Darıǵa Badyqova, qoǵam qaıratkeri Bıbigúl Nurasheva, sharýa qojalyǵynyń basshysy Qaırat Qojahmetov, akterler Bolat Ábdilmanov pen Dýlyǵa Aqmolda, Eýropalyq quqyq jáne adam quqyqtary saraptamalyq ınstıtýtynyń dırektory Marat Báshimov, «Jer amanaty» komıssııasy tóraǵasynyń orynbasary, zańger Baqytjan Bazarbek jáne basqalar kirdi.
Mýzykalyq prodıýser Qydyráli Bolmanov atap ótkendeı, ádiletti Qazaqstandy qurý jolynda elimizdiń barlyq azamaty birigýge tıis.
«Bizdiń maqsatymyz bir – ol kók baıraǵymyzdy bıikte jelbiretip, táýelsizdigimizdi tuǵyrly etý. Bizdiń Otanymyz bir, týymyz bir, ıdeologııamyz ben mádenıetimiz ortaq. Sondyqtan elimizdiń eńsesi budan da bıik bolýy úshin jınaǵan tájirıbemizdiń bárin usyna otyryp, janymyzdy salyp jumys isteýimiz qajet», – dedi ol.
«Ana men bala» qaıyrymdylyq mekemesiniń dırektory Álııa Sátbaeva da óz oıyn ortaǵa saldy.
«Men Almaty oblysyndaǵy Eltaı degen shaǵyn aýylynan kelip otyrmyn. Joldasym ekeýmiz volonterlikpen belsendi aınalysamyz. Bizdi birinshi bolyp «Amanat» partııasy qoldady. Bul – biz úshin úlken jetistik. Partııanyń arqasynda apta saıyn júzdegen muqtaj adamǵa kómek berip jatyrmyz», – dedi ol.
Aıta keteıik, «Amanat»-tyń barlyq óńirlik fılıalynda partııa bıletin 1500-den astam adam aldy. Jalpy jyl basynan beri 29 myńnan astam qazaqstandyq partııa qataryn tolyqtyrdy.
