Bir qaraǵanda ortaq keńistikke qoıylǵan Renata Mashekenova men Elena Serejechkınanyń týyndylary bir birimen tildesip turǵandaı kórinedi. Qylqalam qudiretimen toǵysqan eki kórkemdik tásil bir-birin tolyqtyra otyryp, kórermenderine jańa taqyryptardy ashady.
Eki sýretshiniń de shyǵarmalaryna ortaq taqyryp – kóbelek. Sonshalyqty názik kóbelekterdiń beınesi ózgerý men qaıta túleýdiń nyshany ispetti. Kóptegen mádenıette kóbelek – jandy bildiredi. Jigerleri myqty Renata men Elena kórermenderiniń nazary men empatııasynan úmitti ekendikterin de jasyrmaıdy.
– Men 5 jasymnan sýret sala bastaǵanymmen, beıneleý ónerine sanaly túrde 16 jasymda, maksımalızm men jasóspirimder daǵdarysy aıqyn kórine bastaǵanda keldim. Sýret salý syrtqy álemmen qarym-qatynas jasaý men emosııalar kórinisiniń ózindik ádisine aınaldy. Bul óner ózimdi kóbirek bilýge kómektesip, dúnıetanymyma belgili bir dárejede áser etti, deıdi «Kishkentaı adamnyń shyndyǵy» jobasyn usynǵan genetıkalyq erekshelikteri bar psıholog jáne sýretshi Elena Serejechkına.
Al Renata Mashekenova – psıhıkalyq damý erekshelikteri bar «Deıstvıe Býkvalno» ınklıýzıvti teatrynyń áýesqoı sýretshisi ári aktrısasy, 9 jasynan bastap sýret salyp keledi jáne óz týyndylarynyń jınaǵy da bar.
– Meni beıneleý ónerine jetelegen de, sýret ónerimen tanystyrǵan da atam. О́ıtkeni maǵan sýretterimdi elge kórsetip, olardyń tańdanysy men qolpashyna ıe bolý mańyzdy boldy, deıdi Renata Mashekenova.
Qalaı desek te, Efes Kazakhstan áleýmettik bastamasynyń arqasynda iske asyp jatqan bul joba nazar aýdarýǵa turady. Demalys kúnderi kompanııa qaıyrymdylyq negizinde keńsesiniń birinshi qabatyn óner keńistigine aınaldyrady. Bıyl qyrkúıeginen bastap munda aı saıyn qazaqstandyq sýretshiler men art-ujymdardyń kórmeleri ótkizile bastady.
Osylaısha, kompanııa óz bastamasy arqyly qylqalam sheberleri men talantty óner qaıratkerlerin shabyttandyryp, jarqyn ıdeıalaryna qoldaý kórsetip, jas talanttardyń da ózin kórsetýlerine jol ashyp berip otyr.
ALMATY
