Shaıbaly hokkeıden halyqaralyq týrnırlerge baılanysty eki aptalyq demalysqa shyqqan QHL komandalary dúısenbiden bastap turaqty birinshiliktegi matchtaryn jalǵastyra bastady. Nıjnekamskidegi «Neftehım Arena» muz saraıynda ótken matchta Andreı Skabelka shákirtteri qarsylastaryn 3:1 esebimen tize búktirip, qatarynan úshinshi jeńisine qol jetkizdi. Sóıtip, Astana komandasy «Shyǵys» konferensııasynyń týrnır kestesinde 8-orynǵa kóterilip, pleı-off deńgeıine qaıta oraldy.
Kezdesýdiń birinshi kezeńinde esep ashylǵan joq. Úzilisten keıin jergilikti hokkeıshiler óz ústemdigin júrgize bastady. Sonyń arqasynda aıdyn ıeleri matchtyń esebin birinshi ashty. 33-mınýtta Ansel Galımov Iýlıýs Gýdachek qorǵaǵan qaqpadan sańylaý tapty. Al úshinshi kezeńde «Barys» oıynshylary básekeniń tizginin óz qolyna aldy. Aldymen 42-mınýtta Maıkl Shapıý tarazy basyn teńestirse, arada 12 mınýt ótkende Djeremı Brakko elorda klýbyna basymdyq syılady. Oıynnyń aıaqtalýyna 53 sekýnd qalǵanda Maıkl Shapıý ekinshi ret mergendigimen kózge túsip, matchtyń núktesin qoıdy – 3:1.
«Barys» kelesi oıynyn búgin elordadaǵy «Barys Arenada» Ombynyń «Avangard» klýbymen ótkizedi.
