Sýretti túsirgen Orynbaı BALMURAT
Otandyq ǵalymdardyń arasynda Amangeldi Aıtalynyń orny bólek edi. Onyń aıqyn taqyryby halqymyzdyń rýhanı salasy boldy. Bul teginnen tegin emes-tuǵyn. Aldymen patshalyq Reseıdiń, sonyń saıası jalǵasyndaı bolǵan keńestik júıe halqymyzdyń ulttyq rýhynyń negizi – tilimizge tıisip, dinimizge shabýyl jasap, ulttyq sanamyzdy sý aldyryp, jurdaı etýge tyrysty. Sol sebepti Amangeldi Aıtalynyń 2000 jyly alǵash shyqqan «Ulttaný» oqý quralynan bastap 2019 jyly jaryq kórgen «Rýhanı kemeldik» jınaǵyna deıin kitaptarynda, jazǵan maqalalarynda qozǵaǵany memleket, mádenıet, ıdeologııa, til, din, taǵy basqa rýhanı dúnıemizge qatysty máseleler boldy. Osy názik taqyryptardy maıdan qyl tartqandaı barynsha sheberlikpen oqyrman sanasyna jetkize bildi.
Ábekeń otanshyl azamat, zerdeli ǵalym edi. «Egemen Qazaqstan» gazetiniń jaqynda ǵana, 14 jeltoqsanda jaryq kórgen «Ýkraına taǵdyry: sebep pen sabaq» atty sońǵy maqalasynda «ishki jáne syrtqy saıasatymyzda derbestigimiz unamaıtyndardyń qytyǵyna tımeı, yzasyn keltirmeı, ekinshi jaǵynan, óz upaıymyzdy jibermeıtin joldy qaıta-qaıta anyqtaıyq» deýi de óz halqyn shynaıy súıgen ǵalymnyń júrekjardy sózi bolatyn.
Qaıyr hosh, Ábeke! Jatqan jerińiz jaıly, topyraǵyńyz torqa bolyp, ıman nuryńyz peıishtiń tórinde shalqysyn!
Ábdijálel BÁKIR,
saıası ǵylymdar doktory, professor
