Bul konferensııanyń ereksheligi, onyń teriskeıdegi shekara túbindegi aıadaı ǵana aýylda jáne kóbine ózge ult ókilderiniń belsendi qatysýymen ótkendiginde. Olarǵa Ahmet Baıtursynulynyń rýhanı mol murasy, bilim salasynda jasap ketken reformalary keńinen nasıhattaldy.
Konferensııaǵa aýdandaǵy ondaǵan mektepten ustazdar men oqýshylar jınaldy. Zaharov negizgi mektebiniń dırektory Talǵat Káribaev aıtyp ótkendeı, bul tanymdyq is-sharaǵa daıyndyq jańa oqý jylynyń basynan qolǵa alynypty. Pán muǵalimderi men shákirtter aldyn ala iriktelip, usynylatyn jumystary suryptalǵan.
«Zaharov negizgi mektebi Jelezındegi baıyrǵy bilim uıalarynyń biri, irgetasy sonaý 1974 jyly qalanǵan eken. Qazirgi kúni munda nebári 33 bala bilim alady. Onyń ishinde 10 oqýshy qazaq synyptaryna barady. Jyl saıyn aýylda adam sany azaıyp, oqýshylardyń qatary kemı túsýde. Bul jaǵdaı bizdi aıryqsha alańdatady. Mamandarymyzdyń úsheýi – jas kadr. Biz shekaranyń túbinde, ormandy orys eline jaqyn ornalassaq ta, tilimiz ben dilimizdi, ulttyq dástúrlerimizdi barynsha saqtap otyrmyz. О́zge ult ókilderine qazaqtyń uly tulǵalary jaıynda tanymdyq is-sharalar uıymdastyryp, halqymyzdyń mańdaıyna bitken marǵasqalarymyzdy tanyp-bilýin turaqty túrde nazarda ustaımyz. Osy jumysymyzdyń úlken bir kórinisi – Ahmet Baıtursynulyna arnalǵan ǵylymı-praktıkalyq konferensııa. Aýqymy aýdan kóleminde ǵana bolǵanymen, bul jıynnyń teriskeıdegi qazaq pedagogteri úshin mańyzy asa zor. Biz rýhanı dúnıelerimizdi saqtap, halyqtyń ıgiligine qyzmet etken Alash qaıratkerlerin álemge pash etýimiz kerek. Al onyń bastaýy – kópshilik orystanyp ketken dep sanaıtyn Jelezın sekildi óńirlerde qadam tartyp jatsa, quba-qup», deıdi Talǵat Ermekuly.
Halyqaralyq «Qazaq tili qoǵamy» QB Pavlodar oblystyq fılıalynyń tóraǵasy Asyl Ábishev bekem birlik pen jaqsy tirliktiń nyshany baıqalatyn aýdanda rýhanı dúnıege umtylyp, onysyn órshil isimen baıqatyp júrgen azamattardyń kóp ekenin atap ótti.
«Kózi tirisinde alty Alashtyń rýhanı kósemi atanǵan Aqańnyń telegeı teńiz baı murasyn búgingi is-sharada jas urpaq taǵy bir saraptap, dáleldep berdi. Ult mańdaıyna bitken tulǵanyń mol murasy máńgilikke halyqpen jasaı beredi. Konferensııanyń muǵalimder qatysqan seksııasynda Ahmet Baıtursynulynyń tiltanym, tildi nasıhattaý, oqytyp, úıretý baǵyttary keńinen qamtylyp, ult ustazynyń ǵylymı tujyrymdary men negizderi búgingi zamanǵy oqytý ádistemelerimen sabaqtastyryldy», dedi ol.
Bul kúni ustazdar men oqýshylar ózara seksııalarǵa bólinip, zertteý jumystarymen bólisti. Úzdik dep tanylǵandardyń esimderi qurmetpen atalyp, uıymdastyrýshylar tarapynan arnaıy dıplomdarmen jáne baǵaly syılyqtarmen marapattaldy. №2 Jelezın orta mektebiniń muǵalimi Jansaıa Ilııasovanyń, oqýshylar Tólegen Ashatuly, Ahmet Bekturǵanov, Ular Shady jáne Aýrıka Motynganyń izdenisteri erekshe kózge tústi.
* * *
Sharadan bólek, aýylǵa barǵanymyzda kózge ottaı basylyp, kóńilge kirbiń túsirgen jaıttarmen de bólispese bolmas. Shamamen 80-deı tútini bar Zaharovkanyń jurty búginde taza sý ishe almaı otyr. Kóp otbasy aýyzsýdy 20 shaqyrym jerdegi aýdan ortalyǵynan tasıtyn kórinedi. Taǵy bir másele, munda ońtústikten memlekettik baǵdarlama boıynsha kóship keletin shańyraqtar turaqtap qalmaıdy. Sebebi aýylda deni durys jumys joq, baspanalar da eski. Túrkistan oblysynyń Saıram aýdanynan byltyr otbasymen kóship kelgen Dilnaz Dalabaeva joldasy ekeýi «Dıplommen –aýylǵa!» baǵdarlamasyna ilikkenderin aıtady. «Árıne, munda jalaqysy jaqsy jumys taptyq, balalarymyz balabaqsha men mektepke baryp júr. Alaıda áli kúnge baspanamyz joq, jaldap turýǵa májbúrmiz. Byltyr ońtústik óńirdegi tanystarymyzdy shaqyrǵan edik, kelip kórdi de, qalmaıtyndaryn aıtyp ketip qaldy. Aýylda uıaly baılanys degen atymen joq. Iship otyrǵan sýymyz ashy. Osyndaı jaıttar Zaharovkanyń tynysyn taryltyp otyr», dep muńyn shaqty qazirgi kúni negizgi mektepte qazaq tili men ádebıeti páninen sabaq beretin jas maman.
Bilgenimizdeı, aýyldaǵy bilim berý mekemesiniń ǵımaraty da óte eski, salynǵaly beri kúrdeli jóndeý kórmepti. Arasy yrsıǵan aǵash eden, sylaǵy salbyraǵan tóbe jabyndysy kóńildiń qutyn qashyrady. Aýdan ortalyǵynyń irgesinde turyp, jaıly jaǵdaı jasalmaǵan, zamanǵa saı ıgilikter buıyrmaǵan zaharovkalyqtar búıte berse, endi bir on jylda aýylda adam qalmaı qala ma dep alańdap otyr.
Pavlodar oblysy,
Jelezın aýdany,
Zaharovka aýyly
