«Bıyl órt qaýpi kezeńiniń basynan bastap 800 orman jáne 111 dala órti tirkeldi», dep atap ótti Iýrıı Ilın.
Sonymen birge ol Ekologııa, geologııa jáne tabıǵı resýrstar mınıstrligine orman órtterin erterek anyqtaý júıesin qoldaný tájirıbesin kúsheıtý qajet ekenin atap ótti. Qazirgi ýaqytta osyndaı júıe tek «Býrabaı» tabıǵı parki aýmaǵynda ornatylǵan. Onda munaraǵa ornatylǵan beınekamerelardyń kómegimen ormannyń túkpir-túkpirine derlik baqylaý júrgiziledi.
Premer-Mınıstr Álıhan Smaıylovtyń órt jáne avıasııalyq tehnıkanyń sý alýy úshin tabıǵı jáne jasandy sý aıdyndaryn jasaý týraly tapsyrmasy basty nazarda ekeni de aıtyldy.
Budan ózge oblystardyń ákimdikterine qamys órtengen jaǵdaıda órttiń orman alqaptaryna jáne azamattardyń turǵyn úılerine ótýine jol bermeý úshin qamys ósimdikterin ýaqtyly orý jumystaryn júrgizý tapsyryldy.
О́rtke qarsy qyzmet komıtetiniń tóraǵasy Nurbolat Derbisov órt qaýipsizdigi talaptarynyń saqtalýyn baqylaý maqsatynda 2022 jyly 15 myńnan astam reıd júrgizilgenin atap ótti. Reıdter nátıjeleri boıynsha 1,5 myńnan astam tulǵa ákimshilik jaýapkershilikke tartyldy. Al jergilikti atqarýshy organdarǵa eldi mekenderdiń qaýipti kezeńge daıyn emestigi týraly 1,7 myńnan astam eskertý jasaldy.
