Bıylǵy jańajyldyq keshke 300 bala qatysty. Olardy Astana qalasy ákiminiń orynbasary Eset Baıken kele jatqan jańa jylmen quttyqtady.
«Árbir bala jańa jyl merekesi qarsańynda tylsym bir ǵajaıypty, ertegideı sıqyrdy kútedi. Osyǵan oraı qala ákiminiń atynan ertegi keıipkerleri, mýzykalyq nómirleri men syılyqtary bar konsert uıymdastyryldy. Osy merekemen biz jetim balalardy, áleýmettik az qamtylǵan jáne kópbalaly otbasylardan shyqqan balalardy, sondaı-aq oqýda, sportta, shyǵarmashylyqta nemese qoǵamdyq ómirde jetistikterge jetken daryndy balalardy qamtýǵa tyrystyq», dedi Eset Baıken.
Aıta ketý kerek, bıylǵy shyrsha merekesi zamanaýı tehnologııalardy qoldana otyryp, mýzykalyq-ınteraktıvti shoý-spektakl formatynda ótti. Is-shara túrli zattarmen bezendirilip, túrlendire otyryp, oıyn-saýyq arnaıy effektilermen jáne lazerlik shoýmen súıemeldendi. Sondaı-aq fotoǵa túsýge bolatyn arnaıy oryn uıymdastyryldy.
«Ulym shyrsha merekesin qatty kútti. Kostıýmin birneshe ret aýystyryp, ózine syılyq berile me ekenin surady. Búgingi kesh kóńilimizden shyqty, tek anımatorlarmen oıyndar bolady dep oılaǵan edim, ári qaraı kásibı bıshilermen, tipti opera ánshisiniń qatysýymen konsertke ulasty. Balam kópten kútken merekeniń kóńildi ótkenine rıza», dep bólisti elorda turǵyny Toǵjan Syzdyqova.
Is-shara sońynda balalarǵa kıimder, táttiler, sporttyq rıýkzaktar satyp alý úshin syılyq sertıfıkattary tapsyryldy. Jańa jyl qarsańynda aýdan ákimdikterinde elordanyń búldirshinderi úshin shyrsha merekesi ótkiziledi.
Esterińizge sala keteıik, 25 jeltoqsanda elordada Memleket basshysynyń atynan shyrsha merekesi ótkizilgen bolatyn. Merekege jetim balalar, ata-anasynyń qamqorlyǵynsyz qalǵan, erekshe qajettilikteri bar balalar, áleýmettik az qamtylǵan jáne kópbalaly otbasylardan shyqqan, daryndy jáne oqýda, sportta, shyǵarmashylyqta jáne t.b. jetistikterge jetken 200 bala shaqyryldy.
