Shara basynda aqyn ómirinen syr shertken qoıylym qoıylyp, ómirge kelgen sátinen el qoshemetine bólengen tusyna deıingi shejireli ómiri órnekteldi. Munan soń akademık, jıynnyń moderatory Kárimbek Qurmanálıev kelgen qonaqtarǵa sóz berdi.
Qoǵam qaıratkeri Zeınolla Alshymbaev ótken shaqqa kóz júgirtip, Farıza – jyrdyń bolashaqpen qaýyshqanyn aıtty.
«60-jyldary, stýdent kezimizde, jastarda ádebıetke degen erekshe qushtarlyq bolatyn. Gazettiń betine jaqsy óleńder shyqsa, izdep júrip oqıtynbyz. Farıza apamyzdyń óleńderin á degennen-aq oqyp, súısinip júretinbiz. Halqymyzdyń belgili aqyny Ábdilda Tájibaevtyń Farıza týraly «óleńshimen emes, aqynmen kezdestim, kezdestim de sheksiz qýandym» deıtin sózi bar. Biz búgin bolashaqpen júzdesken aqyn apamyzdyń sharasynda otyrmyz», dedi.
Al tanymal qalamger Saýytbek Abdrahmanov elimizdiń esesi ketken syndarly ýaqytta aqynnyń dátke qýat bolǵanyn jetkizdi.
«Biz bul kúnge op-ońaı jetken joqpyz. Osy qalanyń aty Selınograd edi. Bul qalada jalǵyz ǵana qazaq mektebi bar-tyn. Onyń kóshesi «Kazahskaıa» dep atalatyn. Tipti respýblıkamyzdyń sol kezdegi astanasy Almatyda jalǵyz qazaq mektep-ınternaty bolatyn. Sondaı zamandar bolǵan. Aǵalarymyz «biz osy qalada avtobýsta qazaqsha sóılep kele jatsaq, bizdi toqtatyp oryssha sóıleńder dep aıtatyn, qoryqqanymyzdan túskenshe oryssha sóıleıtinbiz» deıtin. Osyndaı qytymyr zamanda Farızadaı erler shyqqan. Biz nege Farıza apamyzdy osynshalyq aıalaımyz, ardaqtaımyz, qurmetteımiz? О́ıtkeni keshegi qystalań zamanda qazaqtyń esesi ketip, upaıy utylyp jatqan kezde sizderdiń mektepke aty berilgen, ańyzǵa aınalǵan qazaqtyń qaısar qyzy ulttyń muńyn muńdap, joǵyn joqtaǵan. Farıza apamyzdyń eńbegin tek qazaq poezııasyna sińirgen eńbegimen baǵalaýǵa bolmaıdy. Jalpy, Farıza – jalǵyz ádebıet pen mádenıettiń aýmaǵyna syımaıtyn adam» dep salmaqty oıyn sabaqtady qalamger.
Aqyn Ońaıgúl Turjan poezııadaǵy ustazynyń mahabbat lırıkasyna ózgeris ákelgeni týraly tolǵady.
«Farıza aqynnyń mahabbatty názik, muńaıǵan, álsiz, jarymjan, túrtip qalsań, eńirep qoıa bereıin dep turǵan jylaýyq uǵym shekarasynan asqaq ta ór sezim deńgeıine alyp shyqqany shynynda da uly ózgeris edi. Shynynda da revolıýsııa edi. Al qandaı tóńkeris bolsa da, qashanda qarsylyqqa tap bolyp otyratyndyǵyn taǵy bilemiz. Sosyn, synǵa ushyraıdy. О́zindik oppozısııany qalyptastyrady.
«Janym-aı, óziń be bul,
barmyn ba men?
Qansha kún bul sát jaıly órtedi úmit.
Keýdemdi janaǵanda balǵyn deneń,
Dúnıe ketti-aý deımin tóńkerilip», –
degenin óleńin gazet betinen oqyǵan kezde, 70-jyldardyń synshylary shoshyp ketti. Tek munyń ǵajap poezııa ekendigin alǵash moıyndaǵan bir adam boldy. Ol qazaq poezııasynyń klassıgi Ábdilda Tájibaev edi. «Adamnyń shartty túrdegi erejelerge, kanondarǵa, eskirgen ádet, dástúrlerge tutqyn bolyp qalmaı bosanýyn, óz sezimin urlamaı, jasyrmaı, búkpeı sóıleýin qazaq poezııasynda batyl jyrlaǵan osy Farıza», dedi aqyn.
Shara barysynda qonaqtarǵa «Farızataný» bólmesi tanystyrylyp, «Mektep tynysy» atty oqýshylardyń shyǵarmashylyq jumystary kórsetildi. Sonymen qatar mekteptegi ult aspaptar orkestriniń súıemeldeýimen kúı oryndalyp, keshtiń kórkin kirgizdi.
