Jańa baǵytta qoıylǵan shaǵyn dúnıeni ádebı qaýym jyly qabyldady. Tarazdyq jastardyń tyń talpynysyn kórermen zalynan tamashalaǵandar oqyrman júregine jol tapqan «Aıǵyrkisi» áńgimesin útir-núktesine deıin sezinetin kózi qaraqty kórermen retinde, ózderine etene tanys keıipkerlerdiń sahnadaǵy ár qımylyn qalt jibermeı qadaǵalady.
Esqul, Buldı, Jalǵas esimdi negizgi úsh keıipkerdiń obrazy arqyly órbigen qoıylym jazýshy qalamyndaǵy túpnusqadan jelisin úzbegen. «Dúnıeniń túbine jetem dep júrip, balańnyń túbine jettiń be?» nemese «Armannyń ıesi men kıesin saqtaı almaǵan jurttyń kóretini aqyrzaman» degen dıalogter aldamshy dúnıege arbalyp, kıe men qundylyqqa beı-jaı qaraýǵa beıildengen beıneńdi orman oıǵa shomdyryp, tiri keıipkerlerdiń aýzynan shyqqanda quıqań shymyr etedi.
Jazýshynyń shákirti Ardaq Súıinovanyń ıdeıasynan týyndaǵan ujymdyq eńbekte, jas rejısser Daryn Daýmov pen Esquldyń rólin somdaǵan akter Erasyl Bıtanov kórermen yqylasyna bólendi. Qoıylymdaǵy horeografııalyq, mıstıkalyq elementter oqıǵanyń dınamıkasyn arttyra túsken. Qosalqy rólderge Taraz qalasyndaǵy Abaı atyndaǵy Jambyl gýmanıtarlyq kolledjiniń, sondaı-aq «Parasat» bilim ordasynyń stýdentteri tartylǵan.
– Bir kınony bir ǵana sát úshin aıaǵyna deıin kórýge bolady. Sol sekildi tutas bir qoıylymnyń ózegin bir ǵana detal ustap turýy múmkin. Meıli jarty-aq saǵattyq qoıylym bolsa da, jaqsy dúnıeni kórý úshin, ónerdi baǵalaıtyn adam alystan bolsa da keledi. Nesaǵańnyń qalamyn qasterleıtin izbasarlary bárimizdiń janymyzǵa jaqyn, ádebı qaýym áldeqashan moıyndaǵan súıekti dúnıeni sahnaǵa alyp shyqqan eken. Shaǵyn spektakl tórt aıaǵy teń túspese de, jazýshynyń negizgi ıdeıasyn jetkize bilgen. Sondyqtan aldaǵy ýaqytta mundaı tyń dúnıelerdiń kórermeni arta túsedi degen senimdemin. Nesaǵań dúnıege taza qalpynda kelip, tazalyǵymen ketken sábı kóńil adam. Osy bir taza álemdi ardaı kóńilmen sahna tilinde sóıletken jastarǵa alǵys aıtamyz, – deıdi óz áserimen bólisken jazýshy Júsipbek Qorǵasbek.
Avtordyń ishki oıyn zerdelegen shyǵarma sáıgúliktiń sezimi arqyly kisilikke, adamı qadir-qasıetke shaqyrady. Jeke akterlik quramnan turatyn shyǵarmashylyq top atalǵan qoıylymdy keń aýqymda kórsetýge nıetti ekenderin jetkizdi. Qalamger murasyn jańa formatta túrlendirip, sahna tilinde sóıletken jastarǵa bul baǵytta qoldaý kórsetilse quba-qup.
Nesipbek Dáýtaıulynyń shyǵarmashylyǵy, adamı taza bolmysy arqaý bolǵan keshte Jumabaı Shashtaıuly, Dáýren Qýat, Yrysbek Dábeı, Beıbit Sarybaı, Maqsat Málik qatarly qalam ustaǵan qaýym, sertine adal bolǵan jazýshynyń el júregindegi ekinshi ómiri endi bastalǵanyn, onyń talaı shyǵarmasy sahnalyq qoıylymǵa suranyp turǵanyn aıtyp tarqasty.
ALMATY
