Qydyrbek Qıyshan Mońǵolııanyń Baı-О́lke aımaǵynda dúnıege kelgen. 1991 jyly ata-anasyna ilesip Qamysty aýdanynyń Qarabatyr aýylyna kóship kelgen shynashaqtaı bala búginde – óńirge belgili ónerpaz. Mektep qabyrǵasynda júrip oblystyq «Jas tulpar» oqýshylar aıtysynyń 3 dúrkin jeńimpazy atandy, halyqaralyq «Men qazaqpyn» megajobasynyń oblystyq irikteý saıysynda dara shyǵyp, Nurjan Naýshabaıulynyń tarıh tasasynda qalyp, umytylyp bara jatqan «Kóken-aı» ánin tuńǵysh ret kógildir ekran arqyly respýblıka jurtshylyǵyna tanytty.
Shyǵarmashylyq kesh barysynda ónerpaz Arqanyń dástúrli ánderi men «Jorǵataı» syndy sazynda salqar saǵynysh jatqan Altaıdyń ánderin shyrqady.
Qydyrbek – Tobyl-Torǵaı óńirinde qobyzben jyr oryndap júrgen jalǵyz ónerpaz. Kesh qonaqtary ánshiniń oryndaýynda Tátiqara jyraýdyń tolǵaýlaryn tuńǵysh ret tyńdady. Kópshilik kórermen aldynda óner kórsetken «Aqjeleń» folklorlyq-etnografııalyq ansambli, oblystyq fılarmonııanyń ánshileri men teatr ártisteri de shyǵarmashylyq keshtiń mazmundy ótýine atsalysty.
Kesh sońynda óńir zııalylary men mádenıet salasynyń basshysy ónerpazǵa jyly lebizderin bildirdi.
– Osydan otyz jyl buryn atamekenge oralyp, elmen etene aralasyp, osy Tobyl óńiriniń bel balasy bolyp ketken Qydyrbekteı azamatymyzdy sizder búgin taǵy da san qyrynan tanyp, ónerine tánti boldyńyzdar. Áli talaı qaptyń túbinde jatqan halyq qazynasyn jaryqqa shyǵaryp, kópshilikke jarqyratyp kórsetetinine kámil senemiz. Mysaly, osy óńirde kindik qany tamǵan, sózi túgili, ózin umytylyp bara jatqan Tátiqara jyraýdyń tolǵaýlaryn zamanǵa ıkemdep, dáriptep júr. Sondaı-aq Ybyraı atamyzdyń zamandasy, qazaqtyń taq-taq aqyny Nurjan Naýshabaıulynyń da nazymdary men ánderin oryndap, nasıhattap júr, – dedi oblystyq mádenıet basqarmasynyń basshysy Erlan Qalmaqov.
