Tennıs • 29 Jeltoqsan, 2022

United Cup týrnırinde baq synaıdy

184 ret

kórsetildi

1 mın

oqý úshin

Búgin Aýstralııanyń Brısben, Pert jáne Sıdneı qalalarynda tennısten United Cup komandalyq týrnıriniń jalaýy jelbireıdi. Bıyl alǵash ret ótetin jarysqa álemniń eń tańdaýly 18 quramasy qatysady. Olardyń arasynda Qazaqstan tennısshileri de bar.

Álı BITО́RE

Hopman kýbogi jáne ATP Cup jarysynyń ornyn basatyn atalǵan dodaǵa qatysýshylar ATP jáne WTA reıtınginde 500 upaıǵa deıin ıelenip, tabysyn molaıta alady. Bul synda Qazaqstan namysyn Iýlııa Pýtınseva (№51), Jibek Qulambaeva (juptyq synda №202), Gózal Aınıtdınova (juptyq synda №392), Aleksandr Býblık (№37), Tımofeı Skatov (№142), Denıs Evseev (№292) jáne Grıgorıı Lomakın (juptyq synda №205) qorǵaıdy.

Qazaqstandyq tennısshiler V tobynda Polsha jáne Shveısarııa quramalarymen synǵa túsedi. Bul toptaǵy básekelerdiń bári Brısben qalasynda ótedi. Búgin alǵashqy bolyp Iýlııa Pýtınseva, ile-shala Tımofeı Skatov kortqa shyǵady. Pýtınseva shveısarııalyq Belında Benchıchpen sheberlik baıqasady. Jerlesimiz B.Benchıchpen búginge deıin bes márte kezdesip, úsh matchta qarsylasynan basym túsken. Skatovtyń qarsylasy – Mark-Andrea Hıýsler.