2023 jyldyń 1 qańtarynan bastap Qazaqstanda Konstıtýsııalyq Sot óz jumysyn bastaıdy. Májilis tóraǵasy Erlan Qoshanov sýdıalar laýazymyna Qanat Mýsın, Erkin Ońǵarbaev, Sergeı Ýdarsevtiń kandıdatýrasyn usyndy.
Májilistiń Zańnama jáne sot-quqyqtyq reforma komıtetiniń tóraǵasy Arman Qojahmetov olardyń zań salasynda mol tájirıbesi bar bilikti ári tájirıbeli mamandar ekenin atap ótti.
«Qanat Sergeıuly Mýsındi ózderińiz jaqsy bilesizder, quqyqtyq qorǵaý, ádilet organdarynda kóp jyl eńbek etti, Parlament Májilisiniń depýtaty, komıtet tóraǵasy boldy. Qazirgi tańda elimizdiń Ádilet mınıstri», dedi Arman Qojahmetov.
Sondaı-aq májilismen komıtet kandıdattardy qaraý nátıjesinde oń qorytyndy qabyldaǵanyn da aıtyp, áriptesterinen taǵaıyndaýdy qoldaýdy surady. Depýtattar qoldap daýys berdi.
Palata tóraǵasy Erlan Qoshanov Konstıtýsııalyq Sottyń jańa sýdıalaryn qyzmetke taǵaıyndalýlarymen quttyqtap, aldaǵy jumystaryna sáttilik tiledi. Májilis tóraǵasy Erlan Qoshanov Palatanyń birjyldyq qyzmetine qorytyndy jasady. Ol Parlamenttiń tómengi palatasynyń bıyl kóptegen zańnamalyq jumys atqarǵanyn aıtty.
«2022 jyl shyn máninde syndarly ári tarıhı mezgil boldy. О́tken bir jyl ishindegi oqıǵalar memlekettiń, qoǵamnyń bolmysy men tabıǵatyn túbegeıli ózgertti desek, artyq aıtqandyq emes. Jyl basyndaǵy «qańtar oqıǵasy» bárimiz úshin aýyr synaq ári sabaq boldy. Sol synaqtarǵa jaýap retinde, Memleket basshysy Qasym-Jomart Kemeluly Toqaev elde keń kólemdi ári batyl saıası reformalardy qolǵa aldy.
Bul oń ózgeristerdi Jalpyhalyqtyq referendýmda azamattarymyzdyń qyzý qoldaǵanyna bárimiz kýámiz. Qarashada ótken Prezıdent saılaýyndaǵy Qasym-Jomart Kemelulynyń ádil, taza ári kúmánsiz jeńisi – halqymyzdyń sol qoldaýynyń aıqyn dáleli. Sebebi búkil qoǵam bul ózgeristerdiń ádilet úshin, bolashaq úshin aýadaı qajet ekenin jan-júregimen sezinip otyr.
О́zderińiz de bilesizder, qazirgi ýaqytta el azamattarynyń erteńgi kúnge degen úmiti oıanyp, senimi artyp keledi. Eń bastysy, biz osy senimdi joǵaltyp almaýymyz kerek! Halqymyzda «Ádilettiń joly – aýyr» degen sóz bar. Biraq biz bereke-birligimizdiń arqasynda qandaı qıyn joldy da abyroımen eńseremiz dep senemin», dedi E.Qoshanov.
Sondaı-aq Májilis qabyrǵasynda qańtar oqıǵalaryn tergeý barysynyń aldyn ala qorytyndysyn ashyq túrde tyńdalǵanyna toqtaldy. Táýelsiz Qazaqstan tarıhynyń eń bir qaıǵyly paraǵyna aınalǵan qandy oqıǵanyń jaı-japsaryn taldap-talqylaý jalǵasa bermek. Spıkerdiń aıtýynsha, bul kúrdeli másele depýtattardyń udaıy nazarynda bolady.
«Eń aldymen, tarıhı dep ataýǵa bolatyn konstıtýsııalyq túzetýler blogi qabyldandy. Biz Memleket basshysynyń aýqymdy bastamalaryna ýaqtyly jáne sapaly zańnamalyq qoldaý kórsettik. Áleýmettik mańyzy zor birqatar zań qabyldandy. Jalpy, bıyl Májilis jumysynda 154 zań jobasy boldy. 93 zań jobasy qaralyp, Senatqa joldandy, onyń 75-ine Prezıdent qol qoıdy», dedi spıker.
Sondaı-aq Erlan Qoshanov jańa jyldan bastap Palatanyń jańa konstıtýsııalyq sharttar boıynsha jumys isteıtinin jáne budan bylaı zańdar qabyldaıtynyn atap ótti. Sondaı-aq 2023 jyly Májilis saılaýy ótedi.
