Tektiden tekti týady

Mektep jasynan sportqa etene jaqyn bolǵan Dına túrli jarys­ta el namysyn abyroıly qorǵap, qazirgi kezde jankúıerleriniń qoshemetine bólenip júr. Solar­dyń arasyndaǵy eń eleýlisi – 2019 jyly AQSh-tyń Ga­vaı shtatyndaǵy Kaılýa-Kona qala­synda trıatlonnan áýes­qoılar arasynda ótken álem chempıonatyna («Ironman») qatysýy. Sporttyq bul túrinde atalǵan jarysta júldegerler sanatynan kóriný bylaı tursyn, joldama alýdyń ózi ońaı sharýa emes. Osy jaıttyń ózi-aq keıipkerimizdiń qandaı aýyr synaqtan ótkenin ańǵartsa kerek.

Dına Shaımerdenovanyń bas­qa da tabysy az emes. Byltyr ol Bi­rik­­­ken Arab ámirliginde uıym­­das­tyrylǵan «Ironman 70.3 Dubai» dodasynda kúmis medal ıelense, Ázerbaıjanda tusaýy kesilgen «IronWind 70.3»  týrnırinde bas júldeni oljalady. Sonymen qa­tar elordada jalaýy jelbiregen «IRONMAN 70.3 Astana» ja­ry­synyń absolıýtti saıysynda úshinshi orynǵa taban tiredi. Al taıaýda ǵana Dına AQSh-tyń Iýta shtatyndaǵy Sent-Djordj qalasynda jalaýy jelbirgen álem chempıonatynda («Ironman 70.3») qola medaldi moınynda jar­qyratty. Tórtkúl dúnıeniń kileń myqtysy jınalǵan jarys­ta buǵan deıin ataqty veloshabandoz, Olımpııa oıyndarynyń jeńimpazy Aleksandr Vınokýrov qana jeńis tuǵyryna kóterilgen edi. Osylaısha, Shaımerdenova óz esimin osyndaı dárejege jetken Qazaqstannyń tuńǵysh trıatlonshy qyzy retinde sporttyq shejirege tirkedi.  

Negizi Dına kásipqoı sportshy emes. Onyń eki joǵary bilimi bar. Sóz oraıy kelgende, 2021 jyly D.Shaımerdenovanyń «Eren eńbegi úshin» medalimen mara­pattalǵanyn aıta ketken abzal. Ol qarjy salasy boıynsha bas­shylyq qyzmet atqara júrip, sportty da serik etip júr. Al trıat­­lonǵa den qoıǵanyna bar-joǵy jeti jyldaı ǵana ýaqyt bol­dy. Soǵan qaramastan, Dına Saıan­qyzy halyqaralyq arenada ózi­niń myqtylyǵyn moıyndatyp úl­gerdi. Mine, «tektiden tekti týa­d­y» dep osyndaı da aıtylsa kerek.  

Dına ár sózinde ákesi Saıan Shaımerdenovtiń bala júregine sport pen salamatty ómir saltyna degen súıispenshilikti qalap ketkenin aıtady. Iá, bul esim jankúıerge jaqsy tanys. Kezinde syrminez Saıannyń ónerine súı­sinbegen jankúıer joq-aý, sirá! Kógaldaǵy hokkeıdiń has sheberi bolǵan ol Almatynyń dańqty «Dı­namosynyń» namysyn aby­roımen qorǵap, segiz dúrkin KSRO chempıony atandy, eki ret kúmiske qol sozdy. Eýropa chem­­pıondary kýbogin ıelenip, bas­­qa da baıraqty básekede jeńis tuǵyryna kóterildi. О́tken ǵasyrdyń 70-80 jyldary keńes od­a­ǵynyń eń myqty oıynshy­larynyń biri ári biregeıi bol­ǵan Saıan Safýanulynyń «Ha­lyq­aralyq dárejedegi sport sheberi» degen ataǵy bar. Keıin­nen bapkerlikke den qoıyp, Qazaq­stan Respýblıkasynyń eńbek sińirgen jattyqtyrýshysy jáne elimizdiń kógaldaǵy hokkeı federasııasynyń prezıdenti qyzmetterin atqardy. Sonymen qatar, Dınanyń ósip-ónip, el erteńin oılaıtyn tulǵa bolyp qalyptasýyna atasy – Halyq jazýshysy, Memlekettik syılyq­tyń laýreaty, «Otan» ordeniniń ıegeri Safýan Shaımerdenov te mańyzdy ról atqardy.

Atasynyń ult ádebıetindegi jáne ákesiniń otandyq sporttaǵy jetistikteri Dınany árkez jar­qyn jeńiske jetelep, únemi shabyt­tandyryp otyrady. «Asyl atamnyń júrip ótken jo­ly­na qarap, men adaldyq pen ádil­dik, izgilik pen janashyrlyq, jaýapkershilik jáne taǵy basqa kóptegen adamı qasıetti boıyma sińirdim. Aldyma bıik maq­sat qoıyp, soǵan jetý úshin tyn­­baı eńbek etýdi úırendim. Ota­nymdy, elim men jerimdi súıýdiń mańyzdylyǵyn tereń uǵyn­dym. Atam men ákemniń ómir­lik qaǵıdattary bul kúnderi maǵan jumysta da, sportta da kóp kómek berip júr», – deıdi Dına.

Jyl jabylar tustaǵy AQSh-tyń Iýta shtatyndaǵy Sent-Djordj qalasynda ótken álem chem­pıonatyndaǵy («Ironman 70.3») jarqyn jeńisin Dına Saıanqyzy atasy, Halyq jazýshysy Safýn Shaımerdenovtiń ǵasyrlyq mereıtoıyna arnady.