Áıteýir jedel qımyldaǵan sala mamandarynyń arqasynda áleýmettik nysandar men turǵyn úılerge jaryq berilip, arnaıy tehnıkalar qala kóshesin kólkigen sýdan tazartty.
Jyldyń alǵashqy jumys kúni oblys ákimi Nurlybek Nálibaev shuǵyl jıyn ótkizip, mereke kúnderi turǵyndarǵa qolaısyzdyq týdyrǵan kommýnaldyq qyzmetke jaýaptylar jumysyn synǵa alyp, naqty tapsyrmalar berdi.
Jıynda oblys basshysynyń orynbasary Marhabat Jaıymbetov, qala ákimi Asylbek Shámenov, energetıka jáne kommýnaldyq sharýashylyq basqarmasynyń basshysy Rýslan Nurmaǵanbetov naqty jaǵdaıdy baıandady.
Oblys ákiminiń orynbasary Marhabat Jaıymbetov aqaýǵa 70-85 paıyzy tozyǵy jetken elektr jelisi sebep bolǵanyn aıtty. Al energetıka jáne kommýnaldyq sharýashylyq basqarmasynyń basshysy transformatorlyq qosalqy stansııalardy jańalaý jumystaryna qarjy qajettigin sóz etti.
Bul jaýapqa qanaǵattanbaǵan oblys ákimi jaýapty sala basshylary kommýnaldyq mekemelerdiń qysqa tolyq daıyndyǵy týraly esep bergenimen, tabıǵat qubylysy jaǵdaıdy naqty kórsetkenin aıtyp ótti.
– Qysqa jasaǵan daıyndyqtyń deńgeıin bir-aq kún jaýǵan jaýyn kórsetip ketti. Bul – barlyǵymyzǵa syn! Osyǵan deıin de tirshilikti qamtamasyz etý júıeleriniń turaqty jumys isteý qajettigin únemi eskertip kelemin. Elektr júıeleriniń tozǵany belgili. Tozý kórsetkishin 68-den 30 paıyzǵa deıin tómendetý úshin 153 mlrd teńge qajet. Úkimet basshysynyń óńirge jumys sapary barysynda da osy máseleni kóterip, qarajat suradyq. Onyń ishinde mamandardyń qarjy máselesi de qamtylǵan. Bul bir kúnde sheshiletin másele emes. Sondyqtan qol qýsyryp otyrmaı, qoldaǵy bardy uqsatyp, kez kelgen jaǵdaıǵa daıyn bolýymyz qajet edi. Kezinde qaladaǵy úlken transformatorlardyń kúrdeli jóndeý jumystaryna respýblıkalyq jáne oblystyq bıýdjetten bólingen 4 mlrd teńge ýaqtyly ıgerilmeı, keri qaıtaryldy. Osydan 2 jyl buryn durys jasalmaǵan jumystyń zardabyn qazir tartyp otyrmyz. Máseleniń ótkir ekenin eskerip, shuǵyl jóndeý jumystaryna 500 mln teńge bólgenimizben, odan da qaıtarym bolmady. Qala ákimi, basqarma basshysy nemquraıdylyq tanytpaǵanda bıýdjet qarajatyn bekitken ýaqytta qosalqy stansııalardyń jaǵdaıyn retke keltirýge qarjy qarastyrar edik, – dedi oblys basshysy.
Shuǵyl jıynda árbir qosalqy stansııanyń jaǵdaıyna taldaý jasalyp, mamandar kúshimen retke keltirý qajettigi aıtyldy. Tipti bul jumystardy demeýshilerdi jumyldyrý arqyly da úılestirýge bolady.
Oblys ákimi eldi ábigerge salǵan aqaýǵa jol bergen basshylardyń jumysy kóńil kónshitpeıtinin aıtyp, orynbasary Marhabat Jaıymbetov pen qala ákimi Asylbek Shámenovke aýyzsha qatań eskertý, energetıka jáne kommýnaldyq sharýashylyq basqarmasynyń basshysyna, Qyzylorda elektr jelilerin taratý kompanııasynyń jetekshisine, qala ákiminiń orynbasary men jaýapty bólim basshysyna qatań sógis jarııalady.
Oblys ákiminiń birinshi orynbasary Serik Qojanııazovtyń tóraǵalyǵymen arnaıy komıssııa qurylyp, aqaý sebepteri men ony joıý úshin usynys beriletin boldy. Komıssııa quramyna bilikti mamandardan bólek jaǵdaıdy jete biletin sala ardagerleri de endi.
Qyzylorda
