«Zańda qandaı qyzyq ózgerister bolyp jatyr? Biz ǵalymdardyń mártebesin kóterý maqsatynda baıypty qadamdar jasadyq. Elde ǵalymdardyń sany aıtarlyqtaı azaıdy, óıtkeni mansaptyq tartymdylyq deńgeıi óte tómen. Ǵylymı-zertteý ınstıtýttary qyzmetkerleriniń ortasha jasy – 59 jas, al Ǵylym akademııasy músheleriniń ortasha jasy – 69 jas», dedi Saıasat Nurbek vedomstvonyń keńeıtilgen otyrysynan keıin jýrnalısterdiń saýaldaryna jaýap bere otyryp.
Josparlanǵan sharalardy aıta kele, mınıstr ǵylymı mekemelerdiń bazalyq qarjylandyrýy qaıtarylyp jatqanyn túsindirdi.
Sondaı-aq ol ǵalymdardyń jalaqysy 70 paıyzǵa óskenin eske saldy.
«Ǵylymı dárejeleri bar ǵylymı-zertteý ınstıtýttary men joǵary oqý oryndarynyń qyzmetkerleri saralanǵan túrde qosymsha járdemaqy alady. Bul ózgerister engizilýde. Buǵan deıin mundaı derbestendirilgen járdemaqylar bolmaǵan. Zeınetker ǵalymdarǵa ǵylymı jetistikteri úshin qosymsha syıaqylar qarastyrylady. Akademııamyzdyń músheleri men olardyń otbasylary qosymsha medısınalyq kómekke aýystyrylady. Qazaqstandyq ǵalymdar memlekettiń qoldaýyn sezinse eken deımiz», dep qorytyndylady Saıasat Nurbek.
