О́tken jyly 6 qańtarda Almaty qalalyq ákimdigin buzaqylardan qorǵaý kezinde 35-gvardııalyq desanttyq-shabýyldaý quramasy komandıriniń orynbasary, podpolkovnık Sándibek Haıyrov erlikpen qaza tapty. Qańtar oqıǵalary kezinde Taldyqorǵanda qyzmettik boryshyn atqarý kezinde avıasııalyq bazanyń mamany efreıtor Ǵabdolla Smaıylqanov qaza boldy. Sándibek Haıyrovty Qarýly kúshterdiń barlyq áskerı bólimderi men mekemelerinde bir mınýt únsizdikpen eske aldy. Podpolkovnık Haıyrov qyzmet etken Qonaev garnızonynyń desanttyq-shabýyldaý quramasynda mıtıng ótti.
– Qarýly kúshterde Sándibek Haıyrov vzvod komandırinen desanttyq-shabýyldaý quramasy komandıriniń orynbasaryna deıingi laýazymdarda qyzmet atqardy. Ol naǵyz desantshy retinde sońǵy sátke deıin áskerı boryshyna adal bolyp, ajalǵa qasqaıyp qarsy tura bildi. Jaýynger dosymyz týraly estelik júregimizde máńgi saqtalady, – dedi desanttyq-shabýyldaý quramasynyń komandıri polkovnık Beıbit Amanqalıev batyrdyń qurmetine uıymdastyrylǵan mıtıngide.
Áýe qorǵanysy kúshteriniń áskerı bólimderi men bólimshelerinde de eske alý is-sharalary ótti.
– Qaıratty, jas jigitterdiń kisi qolynan qaza bolýy qandaı qıyn?! Bul biz úshin orny tolmas úlken qaıǵy. Ǵabdolla Smaıylqanov sońyna deıin óziniń áskerı boryshy men antyna adal boldy. Biz ony árdaıym este saqtaımyz, – dep atap ótti. Áýe qorǵanysy kúshteri bas qolbasshysynyń orynbasary, polkovnık Álim Ibraev.
Taldyqorǵanda efreıtor Ǵabdolla Smaıylqanovtyń qurmetine ol qyzmet ótkergen áskerı bólimde eske alý buryshy ashyldy. Is-sharaǵa Jetisý, Úshtóbe garnızondarynyń bastyqtary, 21 751 áskerı bóliminiń komandıri, qaza tapqan áskerı qyzmetshiniń týystary men jaqyndary qatysty.
Esterińizge sala keteıik, áskerı boryshyn oryndaý kezinde kórsetken erligi men janqııarlyǵy úshin podpolkovnık Sándibek Haıyrov II dárejeli «Aıbyn» ordenimen, efreıtor Ǵabdolla Smaıylqanov III dárejeli «Aıbyn» ordenimen (qaıtys bolǵannan keıin) marapattalǵan bolatyn.
