Densaýlyq saqtaý mınıstrligi Ǵylym jáne adamı resýrstar departamentiniń málimetinshe, byltyr respýblıkalyq bıýdjet esebinen 4 700 bilim berý granty bólinse, onyń 1 500-i rezıdentýra úshin bólindi. 2022 jyldyń shildesinde bekitilgen medısınalyq bilim berýdiń qabyldanǵan memlekettik standarty 2023 jyldan bastap dárigerlik kadrlardy daıarlaýdyń úzdiksiz ıntegrasııalanǵan modelin engizýge jol ashady. Bul dárigerlerdi daıarlaýdyń jalpyǵa birdeı qabyldanǵan halyqaralyq qaǵıdattaryna sáıkes keledi. Sondaı-aq ýnıversıtetterdi óz klınıkalyq bazalarymen qamtamasyz etýde 6 ýnıversıtettik aýrýhananyń qurylys jumystary bastalǵany, densaýlyq saqtaýdy damytýdyń draıveri bolýǵa múmkindik bermek.
«2025 jylǵa deıin shákirtaqyny jyl saıyn 15%-20%-ǵa ulǵaıtý josparlanýda. Bul jaqsy oqýǵa qosymsha serpin beredi jáne bizdiń joǵarǵy oqý oryndaryna myqty talapkerlerdi qosymsha tartady», dedi vedomstvonyń Ǵylym jáne adamı resýrstar departamentiniń dırektory Dáýlet Aldynǵurov.
Densaýlyq saqtaý mınıstrligi 2021 jyldan bastap óńirlerdiń ótinimderi negizinde rezıdentýrada granttardy bólýdi engizgen. Bul densaýlyq saqtaý júıesiniń kadrlyq saıasatyn sapaly júrgizýge serpin beredi. Byltyr 8 aqpanda salalyq biliktilik sheńberi bekitilse, osy oqý jylynan bastap sanıtarııalyq-epıdemıologııalyq qyzmet mamandaryn daıarlaýdyń 5 jyldyq baǵdarlamasy engizilip otyr. Sondaı-aq 21 kásibı standartty ázirleý boıynsha júrgizilgen jumystar da bıyl jalǵasyn tabady. Iаǵnı 36 kásibı standartty ázirleý jáne ózektendirý josparlanýda. Osylaısha, mınıstrlik medısına qyzmetkerleriniń biliktiligin arttyrýǵa erekshe kóńil bólip keledi. Elimizdegi 9 oblystyń derekteri boıynsha bıyl jergilikti bıýdjet qarajaty esebinen 2 500-ge jýyq dárigerdi, onyń ishinde 43-i shetelde jáne 9 myńnan astam meıirgerdi oqytý josparlanǵan. Al medısına qyzmetkerleriniń kásibı jaýapkershiligin saqtandyrý boıynsha ázirlengen zań jobasy Parlament Májilisiniń qaraýyna engizilip, búginde saraptamalyq qoǵamdastyqtyń talqylaýyna shyǵarylǵan. Bul jóninde vedomstvonyń Kadr departamentiniń basshysy, bıyl atalǵan zań qabyldanyp, 270 myńnan astam medısına qyzmetkeri saqtandyrylady dep kútiletinin, sondaı-aq kelesi jyly mamannyń fýnksıonaldyq múmkindikterin jáne kadr tapshylyǵy kezinde qosymsha eńbek fýnksııalaryn júzege asyrýǵa múmkindik beretin sertıfıkattaý kýrstarynyń tizbesin keńeıtýde jospar qurylyp jatqanyn jetkizdi.
Aıta ketelik, Germanııanyń Densaýlyq saqtaý salasy – Federaldy dárigerler palatasynyń vıse-prezıdenti Ellen Lýndershaýzenniń paıymdaýynsha, keıingi úsh jylda Germanııada pandemııa kezinde naýqastardyń 90 paıyzyna tek ambýlatorııalyq-emhanalyq kómek kórsetilgen. Sondaı-aq qazir elde bastalǵan tumaý tolqynynyń ózinde naýqastardy emdeıtin dárigerler tapshy. Rasynda, daǵdarys pen pandemııa jalǵyz bizdiń elge ǵana emes, álemge sabaq boldy. Elimizde kásibı dárigerlerdiń tapshy ekeni de baıqaldy. Endi aldaǵy ýaqytta Prezıdent tapsyrmalary joǵaryda atalǵan josparlar aıasynda júıeli oryndalsa, otandyq medısınadaǵy ózekti máseleler birte-birte oń sheshim tabary sózsiz.
