Teddı Rıner Almatyda jattyǵady

1989 jyldyń 7 sáýirinde Fransııanyń Pýent-a-Pıtr qala­synda dúnıege kelgen Teddı Rınerdiń boıy – 204 santımetr, salmaǵy – 125 kılo. Tórtkúl dú­nıede odan eńseli dzıýdoshy joq. Al Rınerdiń kúres tásili tipti erekshe. Boıy men qoly­nyń uzyndyǵyn ol keremet paıdala­nady. Qarsy kelgenderdi alyp ta, shalyp ta jyǵyp júrgen balýanǵa Jer-jahan jankúıer­leriniń qurmeti óte zor. Olar ony burynnan «Qonjyq Teddı» dep erkeletedi. Bul janama esim sportshynyń ózine de qatty unaıdy.

+100 kılo salmaq dáre­jesinde kúsh synasyp júrgen Fran­sııanyń alyby 2008 jyly Beıjiń Olımpıadasynda qola medaldi qanaǵat tutty. 2012 jyly Lon­don jáne 2016 jyly Rıo-de-Janeıroda alaýy tutanǵan Olımpııa oıyndarynda qarsylas shaq keltirmeı, bas júldeni oljalady. 2021 jyly Tokıodaǵy dodaǵa ol basty favorıtterdiń biri retinde keldi. Olaı deýge negiz, 2008 jyly eresekter dýyna qosylǵaly beri Teddı nebári úsh ret qana jeńilistiń kermek dámin tatqan eken. Atap aıtsaq, dál sol jyly Beıjińdegi oıyndardyń jartylaı fınalynda ózbekstandyq Abdýllo Tangrıevke, 2010 jyly Tokıoda ótken álem chem­pıo­natynyń fınalynda ja­ponııalyq Daıkı Kamıkavaǵa jáne 2020 jyly Parıjdegi Grand Slem týrnırinde Kún­shyǵys eliniń taǵy bir ókili Ko­koro Kageýraǵa ese jiberdi. Taǵy bir aıta keterlik jaıt – 2010-2020 jyldar aralyǵynda Rıner 154 ret tatamıge shyǵyp, sol beldesýlerdiń barlyǵynda jeńiske jetti. Rasynda da, bul – adam nanǵysyz kórsetkish!

Tokıo Olımpıadasynda asa aýyr salmaq dárejesiniń bas júldesi Teddıge buıyrmady. Ol oıda-joqta reseılik Tamerlan Bashaevqa jol berdi. Odan keıingi eki qarsylasyn utyp, qola medal enshiledi. Biraq dańq­ty dzıýdoshynyń qolaǵa kóńili tolmaǵany anyq. Esesine komandalyq saıysta Fransııa quramasy birinshi oryn aldy. Sol komandanyń sapynda Teddı de boldy. Sáıkesinshe, ol da altyn medaldi moınynda jarqyratty.

Álem chempıonatynyń tarıhyna úńilsek, Teddı Rınerdiń aldyna túsetin birde-bir balýan joq. 2007-2017 jyldar aralyǵynda jalaýy jelbiregen jarysta ol 11 ret bas júldeni qan­jyǵasyna baılady. Fran­sııalyq dzıýdoshy sonyń toǵyzyn jekelegen jarys­ta jeńip alsa, ekeýin komandalyq saıysta ıe­lendi. Odan bólek, bir kúmis pen bir qolasy taǵy bar. Al Eýropa chempıonatynda Teddı bes ret top jardy.

Jalpy, Rınerdiń Qazaqstanǵa kelýi tegin emes. Qazirgi kezde elimizdiń erler men áıelder qura­masyn Nurbol Súleımenov pen Erlan Alpysbaev syndy bilikti mamandardyń baptap júr­geni belgili. Al olardyń keńes­shileri – Fransııadan kelgen qos jattyqtyrýshy Ksave Mon­denksa men Stefana Traıno.