Azııa alamany

Qyrǵyzdardyń qarqyny qatty

Byltyr josparlanǵan Azııa chempıonatyn balýandarymyz bastady. Mońǵolııanyń Ulan-Batyr qalasynda ótken Azııa chempıonatynda kúrestiń úsh túrinen 30 medal jıyntyǵy sarapqa salyndy. Qazaqstan quramasy balýandary sonyń 5 altyn medaline ıe boldy.

Serik Jumashev baptaıtyn grek-rım kúresi 10 salmaqtyń 9-ynda júlde aldy. Eki salmaqta, ıaǵnı 67 jáne 130 kıloda kúresken Meıirjan Shermahanbet pen Álimhan Syzdyqov qarsylas shydatpaı, óz salmaqtarynda top jarsa, taǵy bes balýanymyz fınalda súrinip, kúmis medaldy qanaǵat tutty.

Komandalyq esepte grek-rım kúre­siniń balýandary birinshi orynǵa ıe boldy (upaı sanymen). Alaıda qurlyq básekesi barysynda bizdiń balýandar Iran, Qyrǵyzstan balýandary aldynda dármensizdik tanytty. Qyrǵyz aǵaıyndar 10 salmaqtyń úsheýinde jeńimpaz atansa, parsy elinen kelgen sportshylar 4 salmaqta óz myqtylyǵyn dáleldedi.

Erkin kúresten 86 kılo salmaqta bel­desken Azamat Dáýletbekov altyn al­maǵanda, balýandarymyzdyń qor­jyny bos qaıtar ma edi? Azamattyń byl­tyr­ǵy daıyndyǵy óte jaqsy boldy. Azııa chem­pıonatynda top jardy, álem chem­pıonatynyń qola júldegeri atandy.

Irannyń erkin kúres sheberleri Azııada ǵana emes, álem boıynsha da aldyń­­ǵy qatarda. Olar 10 salmaqtyń altaýynda chempıon atandy. Qalǵan 4 salmaqtyń bas júldesin Qazaqstan, Úndis­tan, Japonııa (2 chempıon) bólisti.

Áıelder kúresinde Jámıla men Má­dına Baqbergenovalardyń ótken jyly baǵy jandy. Jámıla Azııa chempıony degen ataǵymen qatar, álem chempıonatynyń kúmis medalin de jeńip aldy. Onyń sy­ńary Mádına Ulan-Batyrdaǵy Azııa chempıonatynda jeńimpaz atandy. Jyl sońynda AQSh-ta ótken halyqaralyq týr­nırden Mádına men Jámıla bas júldemen oraldy.

Azııa chempıonatynyń qorytyndysy boıynsha grek-rım kúresi 2 altyn, 5 kúmis, 2 qola medal alsa, erkin kúres she­ber­­le­rinde 1 altyn, 3 kúmis, 4 qola medal bar. Qyz­­dardyń enshisinde 2 altyn, 2 qola medal.

Azııa chempıonatynyń qorytyndysy

Grek-rım kúresi

Altyn medal: Meıirjan Sherma­hanbet (67 kılo), Álimhan Syzdyqov

(130 kılo);

Kúmis medal: Amanǵalı Bekbolatov (55 kılo), Meırambek Aınaǵulov

(63 kılo), Abylaıhan Ámzeev (72 kılo), Maq­sat Erejepov (77 kılo), Dıas Qalen (82 kılo);

Qola medal: Ernur Fıdahmetov

(60 kılo), Nursultan Tursynov (87 kılo).

Erkin kúres

Altyn medal: Azamat Dáýletbekov (86 kılo);

Kúmis medal: Rahat Qaljan

(57 kılo), Nurqoja Qaıpanov (74 kılo), Áli­sher Erǵalı (125 kılo);

Qola medal: Aqbar Qurbanov

(61 kılo), Talǵat Syrbaz (70 kılo), Ádilet Daýlambaev (92 kılo), Mamed Ibragımov (97 kılo).

Áıelder kúresi

Altyn medal: Mádına Baqbergenova (68 kılo), Jámıla Baqbergenova (72 kılo);

Qola medal: Juldyz Eshımova

(53 kılo), Gúlmaral Erkebaeva (76 kılo).

Sansyz medalden sapaly medal jaqsy

Batyrbek Esdáýletov baptaıtyn Qa­zaq­stan quramasynyń taekvondoshyla­ry byltyrǵy Azııa jáne álem chempıo­natynda baq synady. Jyl sońynda aıaqtalǵan álem chempıonatynan qor­jynymyz bos qaıtty. Al jaz aıynda Batyrbek bastaǵan qyz-jigitter Azııa chempıonatynan 1 kúmis, 7 qola medalmen oraldy. Eger osyǵan deıingi Azııa chempıonattarymen salystyrar bolsaq, 8 medal jaqsy kórsetkish. Biraq sanynan góri sapasy mańyzdyraq ekenin eskersek, Qazaqstan sportshylary Iran, О́zbekstan, Koreıa, Qytaı sııaqty elderden áldeqaıda tómen nátıje kórsetti. О́zbekstannyń jigitteri 8 salmaqtyń teń jartysynda chempıon atanyp, Koreı quramasyn jolda qaldyrdy. О́zbekstanda sońǵy jyldary taekvondo sporty óte joǵary qarqynmen damyp keledi. Tokıoda ótken Olımpııa oıyndarynda ózbek sportshysy chempıon atandy. Azııa chempıonatynda taekvondony «tól sportymyz» dep tanıtyn Koreıany taqyrǵa otyrǵyzyp ketti. Meksıkada ótken álem chempıonatynda 1 altyn, 1 kúmis, 2 qola medalǵa ıe boldy.

Azııa chempıonatynyń qorytyndysy

Kúmis medal: Jansel Denız (73 kılo);

Qola medal: Rıta Bakısheva (46 kılo), Botakóz Qapanova (49 kılo), Jasýr­bek Israılov (58 kılo), Nuraı Hýsaınova

(67 kılo), Ádilet Bazarbaev (63 kılo), Nurlan Myrzabaeva (80 kılo), Smaıyl Dúısebaı (87 kılo).

Úshinshi orynǵa rıza boldyq

Byltyr Qytaıda jazǵy Azııa oıyn­dary ótetin bolǵandyqtan dzıýdo­shy­lardyń qurlyq birin­shiligi josparda joq edi. Alaıda Qytaı bıligi tórt jylda bir ótetin jazǵy Oıyndardy 2023 jylǵa shegergendikten Azııanyń dzıýdo qaýymdastyǵy qurlyqtyq jarysty Astanada ótkizý týraly sheshim shyǵardy. Bul sheshim dzıýdoshylarǵa álemdik reıtıngte upaı jınaýǵa tamasha múmkindik edi. Biraq bizdiń qyz-jigitter múmkindikterin tolyq paıdalana alamady. Sarapqa salynǵan 14 salmaqtyń tek úsheýinde ǵana fınalǵa shyqqan tatamı sheberleri Japonııany aıtpaǵanda Moń­ǵolııa, О́zbekstan, Birikken Arab Ámir­likteriniń sportshy­laryna upaı berip qoıdy.

Japonııa balýandary bul synda 10 altyn medalmen komandalyq esepte birinshi orynǵa ıe boldy. Mońǵolııaǵa 2 altyn medal buıyrdy. О́zbekstan men Qazaqstan 1 altyn, 2 kúmis, 6 qola medaldan alyp, týrnır kestesinde 3-orynda qatar turdy.

Azııa chempıonatynyń qorytyndysy

Altyn medal: Danııar Shamshaev (73 kılo);

Kúmis medal: Islam Bozbaev

(100 kılo), Abıba Ábýjaqynova (48 kılo);

Qola medal: Maǵjan Shamshaddın (60 kılo), Ǵusman Qyrǵyzbaev (66 kılo), Dıdar Hamza (90 kılo), Nurlyhan Sharhan (100 kılo), Arýna Jangeldına (78 kılo), Aralas qurama (komandalyq jarys).

Boksshylar babyna qashan keledi?

Osydan eki aı buryn ǵana Iorda­nııanyń Amman qalasynda bokstan Azııa chempıonaty ótti. Erler men áıelder arasynda ótken sary qurlyqtyń básekesinde bylǵary qolǵap sheberlerimiz komandalyq esepte birinshi oryn aldy. Alaıda bul erler men áıelder boksyn qosa eseptegende. Al erler men áıelderdi jeke bólip qaraıtyn bolsaq, álsiz tusymyz taıǵa tańba basqandaı, anyq baıqalady. Iаǵnı Qazaqstannyń erler quramasy bul joly da О́zbekstan quramasyn alǵa jiberdi. О́zbek boksshylary sarapqa salynǵan 13 salmaqtyń 5-eýinde bas júlde alsa, bizdiń jigitter tek 3 salmaqta ǵana jeńimpaz atandy. О́kinishtisi sol, fınaldyq básekege joldama alǵan 6 boksshynyń 4-eýi ózbekterden jeńildi.

Bıyl boksshylarymyz úshin óte mańyzdy jyl. Aldymen Tashkentte álem chempıonaty ótedi. Odan keıin Qytaı­da jazǵy Azııa oıyndary jospar­lanǵan. Halyqaralyq Olımpıada komı­teti bokstaǵy salmaq dárejelerine óz­geris engizgen-di. Budan bylaı erler 7 salmaqta, áıelder 6 salmaqta kúsh synasady. Qazaqstan úshin eń basty qar­sylas, ózbekter, árıne. Taıland, Qy­taı, Japonııa, Mońǵolııa, Fılıppın, Úndistan boksshylary da qara jaıaý emes. Sondyqtan Myrzaǵalı Aıt­janov baptaıtyn jigitterimiz jazǵy Azııa oıyndarynda baryn salýǵa tıis.

Azııa chempıonatynyń qorytyndysy

Erler

Altyn medal: Sanjar Táshkenbaı

(48 kılo), Aslanbek Shymbergenov

(71 kılo), Aıbek Oralbaı (92 kılo);

Kúmis medal: Sáken Bıbosynov

(51 kılo), Mahmud Sabyrhan (54 kılo), Serik Temirjanov (57 kılo), Dýlat Bekbaýov (67 kılo), Nurqanat Raıys

(75 kılo), Qamshybek Qońqabaev (+92 kılo);

Qola medal: Samatáli Tóltaev (60 kılo), Nurbek Oralbaı (80 kılo), Saǵyndyq Toǵambaı (86 kılo).

Áıelder

Altyn medal: Alýa Balqybekova (48 kılo), Jaına Shekerbekova (54 kılo), Karına Ibragımova (57 kılo);

Kúmis medal: Gúlsaıa Erjan (81 kılo);

Qola medal: Nazym Qyzaıbaı

(50 kılo), Jazıra Oraqbaeva (52 kılo), Má­dı­­na Nurshaeva (66 kılo), Darıǵa Shákimova (70 kılo), Lıazzat Kúngeıbaeva (+81 kılo).

Mine, Qazaqstan sportshylarynyń Azııa chempıonatynda jetken jetistikteri osyndaı. Jekpe-jek sporty janymyzǵa jaqyn. Oń jambasymyzǵa keletin sport túri. Desek te sońǵy jyldary kúres túr­leri men bokstan kórshilerimizge ese ji­berip júrmiz. Kúreske kelgende qyr­ǵyz, boksqa kelgende ózbek kúshti ekenin moıyn­daıtyn ýaqyt jetken sııaqty.