Eles qyzdar jaıly kóne mıstıkalyq ańyz jelisimen jazylǵan «Jızel» – kópshilikke tanymal balet. Eń alǵash 1841 jyly 28 maýsymda Parıjdegi Grand Opera sahnasynda qoıylyp edi. Osy kúnnen soń kompozıtor A.Adannyń esimi jańasha tanyla bastady. Mahabbat, kiná, shynaıy keshirim men ózin-ózi qurban etý sekildi máńgilik taqyryptarǵa qurylǵan shyǵarma beımálim qııal-ǵajaıyp álemmen astasyp jatyr.
– Shyn mahabbat qana bárin jeńe alady. Sahnaǵa Jızel partııasyn oryndaýǵa ár kez zor tolǵanyspen shyǵamyn. Bul balet ózime qatty unaıdy, bastan keshiretin emosııalarym da ártúrli. Jeńil partııa dep aıta almaımyn, tehnıkalyq turǵyda kúrdeli ári bul dramalyq balette beıneniń emosıonaldyq qanyqtyǵyn túgel jetkizý mańyzdy. Sondaı-aq munyń Dıas úshin de, men úshin de balettegi jetekshi partııalardy basqa trýppamen oryndaýda alǵashqy tájirıbe bolatyny bizge aıryqsha jaýapkershilik júkteıdi, – deıdi Anastasııa Zaklınskaıa.
Al Dıas Qurmanǵazy shyǵarmany jetkizýdegi áserin aıtty. «Maǵan Jızel men Alberttiń dýetindegi tereń ýaıym, náziktik pen keshirimdi jetkizý mańyzdy boldy. Partııalardyń jeńili bolmaıdy, barlyǵynyń ózindik tehnıkalyq, akterlik turǵyda qıyndyqtary bar. Alaıda bizdiń basty maqsatymyz – belarýs qaýymyna zor emosııa syılaý», dedi ol.
Qazaqstan ártisteri «Jızel» baletiniń jańa redaksııasynda óner kórsetedi, onyń premerasy Belarýste byltyr 28 qyrkúıekte ótken bolatyn.
