Tabıǵı gazǵa qosylǵan úıdiń otanasy Gúlnaz Shákenova aýdan ortalyǵynan shaǵyn kafeterıı ashqanyn buǵan deıin habarlaǵanbyz. Qýanyshqa kenelip jatqan kelinshek oblys basshylyǵynyń qoldaýymen tabıǵı gazǵa tegin qosylǵanyn aıtty. Onyń aıtýynsha, buǵan deıin jylyna 10-12 tonna kómirdiń qasyna tamyzyqqa otyn alyp, janǵan ottyń kúlin shyǵaryp, mashaqatyn kórip, bir qysta 200 myń teńge jylýǵa jumsap otyrǵan. Endi tabıǵı gazdyń ár tekshe metrine 30 teńgeden tóleıdi.
Týra jyldyń sońynda tabıǵı gazǵa qol jetkizgen osyndaı qýanysh ózgelerge de juǵysty boldy. Qańtarda Saryózektegi basqa da úıler kógildir otynǵa qosylmaq. Oblystyq turǵyn úı-kommýnaldyq sharýashylyq basqarmasynyń basshysy Ernat Bázildiń aıtýyna qaraǵanda, Kerbulaq aýdandyq ákimdiginiń ǵımaratyna ornalasqan «QazTransGaz» kompanııasynyń mamandary turǵyndardy qabyldaıdy.
«Búgin ózderińizdiń qatysýlaryńyzben bir otbasyn gazǵa qosyp otyrmyz. Aýdan ortalyǵyna 1 magıstralmen gaz kelip tur. Endi Saryózektiń halqy «QazTransGaz» kompanııasynan tehnıkalyq sharttardy alyp, tabıǵı gazǵa qosylýǵa múmkindik alady. Gaz aýylǵa tolyǵymen keldi», degen Ernat Dúısenbekuly aldaǵy jyldardyń josparyn tanystyryp ótti. «Aýdan ortalyǵynan bólek taǵy 25 eldi mekendi gazǵa qosý josparda tur. Dál qazir beseýiniń jobasy saraptamadan ótip jatyr. Qolymyzǵa tıe salysymen qurylysyn bastaımyz. Qalǵan 20 aýylǵa avtomatty gaz taratý stansasyn ornatýdyń jobalyq-smetalyq qujattamasyn jasaýǵa baıqaý jarııalaımyz. Shartty jumystary jazǵa salym aıaqtalsa jyl sońyna deıin 20 aýylǵa gaz tartý jumystary bastalady. Aldaǵy 2024 jylǵa deıin olardyń bári aıaqtalýǵa tıis».
О́ńirge arnaıy kelgen el Prezıdenti Saryózekten bastap Taldyqorǵanǵa deıingi aralyqta jatqan aýyldarǵa gaz jetkizýdi tapsyrma retinde júktedi. Odan soń Aqsý, Sarqan, Alakól aýdandaryna 350 shaqyrymdyq magıstraldy qubyrmen tabıǵı gaz jetkizý mindeti tur. Onyń jobasy daıyn. Bıyl qańtar, aqpan aılarynda memlekettik saraptamadan ótse qajetti jumystar bastalady. Bul baǵyttaǵy jumystar 3 kezeńmen júrgiziledi.
Osy rette aıta keteıik, osyndaı qýanyshty jańalyq Eskeldi aýdany, Tóleńgit aýyldyq okrýgine qarasty Ekpindi aýylyna da oryn aldy. Munda gaz tartý jelilerin salý jumysy 2022 jyly bastalyp, búginde merziminen buryn aıaqtalyp otyr.
«Aýyldyń damýy, kelesheginiń zor bolýy sizderge, ıaǵnı sizderdiń eńbekqorlyqtaryńyz ben birlikterińizge baılanysty. Sondyqtan da, árqashan birligimiz bekem, yntymaǵymyz yrysty bolsyn! Aýdanymyzdyń maqtanyshy bolatyndaı Ekpindi aýyly gúldenip, ıgi isterimiz odan ári jalǵasa bersin», dedi aýdan ákimi Eldos Ahmetov.
Ekpindi aýylynyń turǵyndary kópten beri kútken janalyqqa qýanyshtaryn jasyrmaı, aýdan basshysyna alǵys bildirdi. Qýanyshty sátte aýdandyq ardagerler keńesiniń tóraǵasy Bımýrat Boranbaev jınalǵan qaýymǵa óz batasyn berdi.
Oblystyq turǵyn úı-kommýnaldyq sharýashylyq basqarma basshysynyń aıtýynsha, halyqty tabıǵı gazǵa qosýdyń baǵasy óńir boıynsha 135-175 myń teńgeniń aralyǵynda. Merdiger kompanııalar baǵany jónsiz ósirmeýi úshin tabıǵı gazdyń peshteri men qajetti tetikterin molynan satyp alyp, turǵyndarǵa uzaq ýaqytqa qaryzǵa berý josparlanyp otyr. Sonda ǵana gazǵa qosýdyń baǵasyn turaqtandyrýǵa bolady.
Jetisý oblysy
