Eriktilerdiń kómegi

Ásirese, qardy tańsyq kóretin maqtaly aımaq turǵyndary qoıan jylynyń qańtaryn umyta qoımas. Olaı deıtinimiz, Maqtaaral aýdanynyń turǵyndary mundaı qardy sońǵy ret 1995 jyldary kórgenin aıtýda. Apta basynda da aýdanda aýa-raıy kúrt sýytyp, toqtaýsyz qar jaýdy. Osy oraıda maqtaaraldyq jas­tar kópke úlgi bolyp, jalǵyzilikti qarttardyń úılerine baryp, aýlalaryn qardan tazartýǵa kómektesti. Aýdandyq «Jastar resýrstyq or­ta­lyǵy» KMM-niń bastamasymen uıymdastyrylǵan qaıyrymdylyq is-sharasyna 2 kent pen 9 aýyldyq okrýgten 100-den astam erikti jastar qatysqan. Jalǵyzilikti qarttardyń tizimin aýdannyń jumyspen qamtý jáne áleýmettik baǵdarlamalar bó­li­mi jasaqtap bergen. Sondaı-aq maq­taaraldyq jastar qar tazalaýǵa jumyldyrylǵan jumysshylarǵa shaı, kofe, bálish, quımaq, samsa jáne táttiler úlestirdi. Qar kúreý jumystaryna kómek kórsetti.

Túrkistan oblysynyń barlyq aýmaǵynda derlik qar qalyń tústi. Aýa-raıynyń kúrt ózgerýinen taýly aımaqtarda jeldiń ekpini sekýndyna 30 metrden asyp, taýly aýdandardaǵy respýblıkalyq mańyzy bar joldar jabylyp, birqatar eldi mekende elektr jelileri isten shyqqan bolatyn. Respýblıkalyq mańyzy bar avtomobıl joldaryn qardan tazalaý jumystary toqtaýsyz júrgizilýde. Oǵan arnaıy tehnıkalar tartylǵan. Atap aıtqanda, 33 jol tazalaıtyn kólik, 7 avtogreıder, 18 traktor jumyldyrylǵan. Al Jetisaı qalasy men aýdan aýmaǵyn qalyń qardan tazalaý jumystaryna 15-ke tarta túrli tehnıka men 130 adam jumyldyrylǵan. Sondaı-aq óńirde qatty jelden qu­la­ǵan elektr baǵanalary qalpyna keltirilip, úzilgen elektr tasymaldaý jelileri jóndelýde. Sońǵy aqpa­rat­tarǵa sáıkes, Báıdibek pen Sozaq aýdandarynda 15 elektr ba­ǵa­na­sy qalpyna keltirildi. Eki aýdanǵa «Ońtústikjaryq» mekemesiniń jóndeý brıgadalary jumyldyrylyp, 3,5 myńnan astam abonenttiń 2 myńǵa jýyǵyna jaryq berildi, 27 arnaıy brıgada men 30-dan astam arnaıy tehnıka jumys isteýde. Sala basshylary úzilgen elektr jelilerin jalǵaý jumystary birneshe kúnge jalǵasatynyn jetkizdi. Oblys ákimi Darhan Satybaldy Báıdibek aýdanyna arnaıy baryp, boran men jeldiń saldarynan bolǵan jaǵdaıdyń zardaptaryn joıý jumystarymen tanysty. Jaýapty basshylarǵa, mamandarǵa joldardy qardan tazalap, eldi meken­der­degi elektr jelilerin jóndeý ju­mys­taryn jedeldetýdi tapsyrdy. Turǵyndarmen kezdesip, qalpyna keltirý jumystary jóninde baıandady. Qatty jel men qarly borannyń saldarynan Sozaq, Otyrar, Qazyǵurt, Saýran, Báıdibek aýdandarynda elektr jelileri úzilgen bolatyn. Birqatar aımaqta ol qalpyna keltirildi, jumys áli de jalǵasýda. Bul baǵyttaǵy ju­mys­tarǵa «OńtústikJaryqTranzıt» JShS tarapynan 37 brıgada, 41 tehnıka tartylǵan.

Túrkistan oblysy