7 qańtar kúni kómirli shahardaǵy jylý-energo ortalyǵynda apat qaıtalanyp, 3 birdeı jylý qazandyǵy isten shyǵyp qalǵan edi. Sol kúni qalada ornalasqan úılerdiń biraz bóliginde jylý batareıalary sýyp, Ekibastuz halqy taǵy qatyp qala jazdady. Abyroı bolǵanda bul ýaqytta aýa raıy oń qabaq tanytyp, aıaz túse qoımaǵan. Alaıda sol apattyń kesirinen qazirgi kúni jylý jelilerindegi jaǵdaı máz bolmaı tur. Stansadaǵy apat tez arada rettelip, qazandyq agregattary qatarǵa qosylǵanymen, turǵyn úılerdegi jylý parametrleri áli de tómen.
Oblys ákimi Asaıyn Baıhanov aıazdy kúnderi Ekibastuz qalasyna baryp jaǵdaımen tanysty. О́ńir basshysy áleýmettik jelidegi paraqshasynda habarlaǵandaı, jylý parametrlerin qalpyna keltirý jumystary jalǵasýda. JEO-da qazirgi kúni 6 qazandyq jumys istep tursa, qalǵan 4-eýi jóndelý ústinde. Jylý tasymaldaǵyshtyń temperatýralyq parametrleri selsıı boıynsha 77/54 gradýsty kórsetip tur dedi ákim. Bul gradýs qalypty jaǵdaıdaǵy kórsetkishten, árıne, tómen, norma aıazdy kúnderi keminde 82/56 gradýsty quraýy kerek edi.
– Jylý parametrleriniń tómendeýine baılanysty qalanyń 25 mektebiniń ekeýi (№11 jáne №21) qashyqtan oqytý formatynda qalyp otyr. Berkimbaev kóshesindegi №21 orta mektebinde jelilerdegi josparly jóndeýge baılanysty problemalar týyndady. Jóndeý jumystary aıaqtalyp qaldy, kóp uzamaı mektep oqýshylary qaıtadan oqý ordasymen qaýyshady. Al №11 mektepte jylý aınalymy álsiz júrýde. «Ekibastuzjylýenergııasy» JShS-nyń apatty joıý brıgadalary eńbek etýde. Olarǵa bir táýlik ishinde problemany sheshý mindeti júkteldi, – dedi Asaıyn Qýandyquly.
Qaladaǵy jylý jelileriniń ár jerinde 38 zaqymdalý anyqtalypty. Ony joıý jumystary táýlik boıy atqarylyp jatyr. Oblys ortalyǵynan arnaıy brıgadalar kómekke barǵan. Bir sózben aıtqanda, Ekibastuzdy jylýmen jabdyqtaý qazir oblys basshylyǵynyń turaqty nazarynda tur. Ondaǵy jedel shtabty basqaryp, barlyq qyzmetterdiń is-qımylyn úılestirý úshin oblys ákiminiń birinshi orynbasary Hasar Habylbekov baqylaý jasaıdy.
Kúnniń sýyqtyǵyna baılanysty apta basynan óńirde avtojoldar aýyq-aýyq jabylyp, mektepterdiń basym bóligi oqýshylardy qashyqtan oqytýǵa kóshti.
Jyldyń alǵashqy onkúndiginde jaýǵan mol qardy tazalaý jumystary áli kúnge jalǵasýda. Soǵan oraı Pavlodar qalasyndaǵy kommýnaldyq qyzmetter kúsheıtilgen jumys rejimine kóshti. Shahar kósheleri men kópqabatty úı aýlalaryndaǵy aq ulpa táýlik boıy tazalanyp, syrtqa tasylýda. Jergilikti baspasóz qyzmeti habarlaǵandaı, bul jumystarǵa búginde 210 arnaıy tehnıka men 200-den astam adam jumyldyrylǵan. Taǵy 8 brıgada tehnıkalar jete almaıtyn jerlerge qum shashyp, jaıaý júrginshiler joldaryn baqylaýda ustaýda. Negizi qala kósheleri men aınalma joldardyń tazalyǵyna eki merdiger kompanııa – «Holdıng-Trans-Pavlodar» jáne «Gorkomhoz-Pavlodar» seriktestikteri jaýapty ekenin aıtyp ótken abzal. Jyl basynan beri shahardan 195 myń tonna qar syrtqa shyǵarylǵan.
Taǵy bir másele, ótken aptanyń sońynda jaýǵan jańbyrdan soń jylqy tebinderi men qysqy mal jaıylymdary toń bolyp qalǵany sharýa baqqan aǵaıyn úshin qıynǵa soǵyp tur. Maı, Baıanaýyl, Aqqýly aýdandary men Ekibastuzdyń aýyldyq aımaǵyndaǵy mal ósirýshiler qys uzaqqa sozylar bolsa jaǵdaı qıyndaı túsetinin aıtady.
Pavlodar oblysy
