Qalyń qar basyp qaldy

Soltústik óńirler úshin bul qalyp­ty jaǵdaı bolsa, respýblıkanyń kúngeıin­degi qala úshin álbette, tosyn oqıǵa. Aýa raıynyń kúrt buzylýyna baılanysty shahardyń kommýnaldyq qyzmeti men tótenshe jaǵdaı departamenti jáne bas­qa da tıisti uıymdar kúsheıtilgen ju­mys rejimine kóshti. Osyǵan oraı me­ga­polıstiń ákimshilik aýdandary óz aýmaǵyn qardan tazalaý úshin qa­jet­­ti tehnıkalar men brıgadalardy jumyl­dyrdy.

Deı turǵanmen qalyń qar qalalyq­tardy biraz ábigerge salyp úlgerdi. Shet jaqty bylaı qoıǵanda, keıbir or­­ta­­lyqqa jaqyn kúre joldardyń ózi qar­dan kúrelmeı, kólikterdiń júrýin qıyndatty. Tipti Almaty aınalma tas jolynda tańerteń júk kólikteriniń keptelisi oryn aldy. Kóshe qıylystarynda birneshe jol-kólik oqıǵalary boldy. Jolaýshy tasymaldaýshy avtobýstar kestesinen jańylyp, aıaldamalarda qoǵamdyq kólik kútken halyqtyń qatary kóbeıdi.

Osylaısha, jyl basynda qys qaha­ryna mindi. «Kári qudanyń» Shym­kentte sońǵy ret qashan bulaı álek salǵanyn turǵyndar tipti esine túsire almaıdy. Biraq adamdardyń paıymynsha, mundaı qalyń qardyń jaýmaǵanyna jıyrma, tipti odan da kóp jyl bolǵan.

Kúnniń kúrt buzylatyny týraly «Qaz­gıdromet» RMK aldyn ala eskertý jasaǵan-dy. Arnaıy habarlamada gıdro­meterologııalyq qyzmet aptanyń basynda qar jaýyp, aýa temperatýrasy -3, -5 gradýsqa, 13 qańtarǵa qaraı -20 gradýsqa deıin tómendeıtini jaıynda habarlaǵan. Osyǵan baılanysty «Sý resýrstary – Marketıng» mekemesi turǵyndardan sý qubyrlarynyń aıazdy kúnderi qatyp qalmaýyn qadaǵalaýdy ótindi.

Sonymen birge Shymkent qalalyq bilim basqarmasy 10-11 qańtar kúnderi aralyǵynda 1-8 synyp oqýshylaryn qa­shyqtan oqytý týraly sheshim qa­byl­dady. Al 9-11 synyp oqýshylary dás­túrli formatta bilim alýdy jalǵas­tyra beredi.

Tótenshe jaǵdaılar departamentiniń málimetinshe, qalyń qar saldarynan qalada birneshe oqys oqıǵa oryn alǵan. «Nursát» shaǵyn aýdanyndaǵy №114 úıdiń aýlasynda jalpy kólemi 252 sharshy metrdi quraıtyn eki bastyrma qulap, 5 avtokólikti basyp qalǵan.

Oqıǵa ornyna TJD órt sóndirý já­ne avarııalyq qutqarý jumystary qyz­metiniń mamandary tehnıkasymen jedel bardy. Adamdar zardap shekken joq. Budan bólek Turan aýdanyna qarasty «Sáýle» shaǵyn aýdanynda «DAF» markaly júk avtokóligi, Qursaı shaǵyn aýdanynda qalaaralyq №60 baǵyttaǵy avtobýs qarǵa tyǵylyp qalǵan jerinen tartyp shyǵaryldy.

Osy jaǵdaıǵa baılanysty Shymkent qalasy ákiminiń orynbasary Erǵalı Bilisbekov arnaıy brıfıng ótkizdi. On­da sala basshysy qalyń qardy taza­laýǵa 350-den astam tehnıka jumyl­dy­rylǵanyn aıt­ty. Sondaı-aq aıaqjoldar men aıaldama­lar mańyn qardan kúreýge 1 140 ju­mysshy jumyldy. Aıazdy kún­de jy­lýdy únemdeý úshin zaýyttar men iri fab­rıkalardyń jumysyn ýaqyt­sha toqta­ta turýǵa ákimdik tarapynan kelisim júrgizilipti.

Al sınoptıkter taratqan málimetke súıensek, 10 qańtar kúni saǵat 9:00-degi jaǵdaı boıynsha qardyń qalyńdyǵy 26 santımetrge jetken. Aýa raıyn boljaýshy mamandar deregine sáıkes dál osyndaı qalyń qardyń jaýýy osydan 49 jyl buryn, ıaǵnı 1974 jyly bolǵan eken.

Sonymen Shymkentte shamamen bir jarym kún boıy toqtaýsyz qar jaýdy. 11 qańtarda kúnniń kózi ashyldy. Degenmen dalada aıazdyń bary seziledi. Negizgi ortalyq kósheler kúreldi. Jumysshy brıgadalar aıaqjoldardy tazalap, júk kólikterimen úıilgen qardy syrtqa shyǵaryp jatyr. Degenmen joldar kóktaıǵaq. Osyǵan baılanys­ty tótenshe jaǵdaılar departamenti turǵyndardy, sonyń ishinde kólik júrgizýshilerin saqtyq sharalaryn saqtaýǵa shaqyryp otyr. Qalany qardan tazalaýǵa kommýnaldyq qyzmet salasy jumysshylarymen birge qarapaıym turǵyndar da, eriktiler de óz úlesterin qosty. Qar jaýǵan kúni ortalyq kóshelerdiń ózi der kezinde kúrelmeı jatqanǵa halyq áleýmettik jeli arqyly kommýnaldyq qyzmet salasyn biraz syn sadaǵyna alǵan edi. Deı turǵanmen kópshilik tabıǵattyń keıde osylaı bolyp turatyn tosyn qubylysyna adamzattyń kórseter aıla-sharasy joq ekenin uǵynyp, túsinistikpen qarady. Al jumyla kirisken istiń nátıjesinde tazalaý jumystary yń-shyńsyz atqarylyp, úshinshi megapolıstegi tirshilik qaıtadan burynǵy arnasyna túse bastady.

ShYMKENT