Mamannyń aıtýynsha elimizde jyl saıyn 35 myńnan astam adam obyrǵa shaldyǵady, 14 myńnan astamy bul dertten kóz jumady. Qazir 200 myńǵa jýyq adam dáriger esebinde tur. Statıstıkalyq málimetterge súıensek, Qazaqstanda onkologııa - ólim-jitim boıynsha úshinshi orynda turǵan aýrýlardyń biri.
«Keshendi jospardyń is-sharalaryn iske asyrý kezinde qaterli isikterden bolatyn ólim-jitimdi orta eseppen 5%-ǵa tómendetýdiń oń úrdisi bar. 2022 jyly Qazaqstanda onkologııalyq naýqastar kontıngenti 205 042 naýqasty quraǵan. 2022 jyldyń 11 aıynda qaterli isikterden bolatyn ólim- jitim kórsetkishi 100 myń turǵynǵa shaqqanda 65,7%-dy, ıaǵnı 11 806 jaǵdaıdy qurady, bul ólim-jitim kórsetkishiniń 8,3%-ǵa tómendegenin kórsetedi», dep atap ótti Dılıara Qaıdarova vedomstvonyń alqaly otyrysynda.
Aty jaman dert arasynda ókpe obyry (16,5%, 1 945 jaǵdaı) kósh bastap tur. Ekinshisi – asqazan obyry (11,8%, 1 411 jaǵdaı) bolsa, úshinshisi – kolorektaldyq obyr (10,7%, 1 242 jaǵdaı) jáne tórtinshisi - sút bezi obyry (8,2%, 959 jaǵdaı) eken.
Dılıara Qaıdarovanyń aıtýynsha, onkologııalyq qyzmet baǵdarlamasy tehnıkalyq qaıta jaraqtandyrýdy kózdeıdi. Sondaı-aq qolda bar dıagnostıkalyq jabdyqty jańartýǵa, eskirgen appparattardy aýystyrý esebinen sáýlelik emdeýdi damytyp, myqty mamandardy daıarlaýǵa septigin tıgizedi.
Gúlshahra SANSYZBAI
