«Azamattarǵa arnalǵan úkimet» memlekettik korporasııasy» KeAQ oblystyq fılıalynyń baspasóz qyzmeti málim etkendeı, atyraýlyq júrgizýshiler arasynda VIP nómirlerge suranys artqan. Máselen, burnaǵy jyly atyraýlyq júrgizýshiler 961 VIP nómir satyp alý úshin 249 mln 335 myń 283 teńge tólegen. Al byltyr munaıly óńirde tirkelgen kólikterge 241 mln 307 myń 788 teńgeniń VIP nómirleri taǵylǵan.
– Eń qymbat nómirdiń bireýi 983 myń 250 teńgege baǵalandy. Júrgizýshilerdiń suranysyna baılanysty árqaısysy 786 myń 600, 472 myń 650 jáne 196 myń 650 teńgege baǵalanǵan VIP nómirler saýdaǵa shyǵaryldy. О́tken jyly sany men áripter tizilimi birdeı 856 memlekettik tirkeý belgisi bar nómir rásimdeldi, – dep habarlady óńirlik fılıaldyń baspasóz qyzmeti.
Bıyl aılyq eseptik kórsetkishtiń ósýine baılanysty joǵary suranysqa ıe VIP nómirler quny 196 myń 650-den bastalyp, 983 myń 250 teńge aralyǵynda qubylady. Memlekettik nómirler quny sandyq jáne áripter sáıkestigine baılanysty ózgeredi. Al qarapaıym memlekettik nómirlik tirkeý tańbalary 9 myń 660 teńgeni quraıdy.
– Kólikke taǵylatyn memlekettik nómir ıesi ony ózge adamǵa syılaýyna, satylymǵa shyǵarýyna bolmaıdy. Burynǵy kóligin satqan bolsa, jańa kólik alǵansha – 6 aıǵa deıin memlekettik nómir belgisin halyqqa qyzmet kórsetý ortalyǵynda saqtaýyna bolady, – dep málim etti baspasóz qyzmeti.
Atyraý oblysy
