Jańa jyldyń josparyndaǵy shyǵarmashylyq jańalyqtar da az emes. «Astana Opera» teatrynyń dırektory Ǵalym Ahmedıarov óner ordasynyń repertýaryndaǵy aldaǵy ózgeristermen bólise otyryp, mereıtoılyq maýsymda áıgili oryndaýshylar men spektaklderdi bezendirýge sheteldiń myqty mamandaryn arnaıy shaqyratynyn aıtty.
«Teatr úshin mereıtoılyq jyl V.A.Mosarttyń mýzykasyna cheh horeografy Irjı Kılıannyń «Kishkentaı ólim» baletiniń premerasymen jalǵasady dep josparlap otyrmyz. Sondaı-aq kompozıtor German Levenskoldtyń «Sılfıda» baletiniń qoıylymyna daıyndyq júrip jatyr. Odan bólek sheteldik áriptestermen birlesken halyqaralyq jobalar ázirledik. Tanymal ujymdardyń bizdiń sahnada gastroldik óner kórsetýleri de josparlanyp otyr. Máselen, Borıs Eıfmannyń balet teatry kelip, «Anna Karenına» men «Pıgmalıon effektisi» spektaklderin usynady», dedi teatr dırektory.
Atalǵan óner ujymy balalarǵa arnalǵan shyǵarmalardy da qamtyp keledi. Birneshe aı buryn S.Prokofevtiń mýzykasyna «Kúlbıke» baletiniń premerasy ótken edi. Jaqynda Jolan Dástenovtiń «Qańbaq shal» ertegi-operasy repertýarǵa engizilmek.
«Budan bólek kúzge qaraı «Operalııa» halyqaralyq mýzykalyq festıvalin ótkizemiz. Aıta keteıik, bul festıvaldiń uıymdastyrylyp júrgenine de jıyrma jyldan asty, onyń tarıhy Kúlásh Baıseıitova atyndaǵy opera jáne balet teatrynan bastalady. Eki onjyldyqtan astam ýaqyt boıy oǵan álemdik opera men balet sahnasynyń juldyzdary qatysty. Osy festıval aıasynda balalarǵa arnalǵan spektaklder de kórsetiledi», deıdi Ǵ.Ahmedıarov.
Iá, teatr repertýary ár jyl saıyn tolyǵyp, jańaryp otyrady. Atalǵan shyǵarmashylyq ujymynyń sahnasynda da kópten beri qoıylmaǵan keıbir spektaklder osy jyly qaıta jańǵyrtylmaq.
