Infografıkany jasaǵan Amangeldi Qııas, «EQ»
OLX.kz onlaın-habarlandyrý servısiniń sarapshylary servıs derekterine súıene otyryp, 2022 jyldyń qorytyndysyn shyǵarypty. Biz keltirgen derektiń bári sonda qamtylǵan. Sonymen sońǵy derekterge nazar aýdarsaq. Servıs aýdıtorııasy ótken jyly aıyna 11 mln belsendi paıdalanýshyǵa jetken, al berilgen habarlandyrýlar sany 25,5 mln-nan asty. Byltyr OLX-te mınýtyna orta eseppen 12 mámile jasalǵan. Onlaın-saýdadaǵy eń tanymal sanattarǵa «uıaly telefondar», «jyljymaıtyn múlik» jáne «jıhaz jasaý» kirip otyr. Servıste jumys izdeý boıynsha 120 myńnan astam túıindeme ornalastyrylǵan. Habarlandyrýlar sany boıynsha eń qarqyndy ósip kele jatqan sanattyń biri – «kólik». Munda «avtomobıl bólshekterin satý» jáne «qalaaralyq tasymaldaý» qyzmetterine suranys joǵary eken.
«2022 jyldyń negizgi trendi retinde shaǵyn jáne orta bıznestiń onlaın-rejimge aýysý dınamıkasyn jalǵastyrýyn aıtýǵa bolady. О́zderińiz biletindeı, pandemııanyń, sondaı-aq ekonomıkalyq jáne saýda baılanystarynyń aıtarlyqtaı buzylýynyń saldarynan otandyq shaǵyn jáne orta bıznes jappaı onlaın-rejimge kóship jatyr. Tıisinshe, qoǵamda sıfrlyq tutyný ádeti qalyptasýda. Osylaısha, bıznes kez kelgen qajettilikterdi úzdiksiz ári sheksiz júzege asyrýǵa múmkindik beretin platformalarǵa nazar aýdara bastady. Sóıtip, shaǵyn jáne orta bıznestiń ókilderi úshin onlaın platformalar jumysty jalǵastyrýda jáne jańa klıentterdi tartýda úlken kómek bolyp otyr. Aıtalyq, byltyr OLX.kz servısi bazasynda ashylǵan ınternet-dúkender sany 2021 jylǵy kórsetkishten 4 ese asyp túsken», dep habarlady sarapshylar.
Byltyr servıstegi habarlandyrýlardyń eń kóp bóligin Almaty jáne Astana qalalarynyń turǵyndary ornalastyrǵan. Habarlandyrýlardyń jalpy sanynyń 24 paıyzy almatylyqtarǵa, 15 paıyzy astanalyqtarǵa tıesili. Túrkistan jáne Ulytaý óńiri turǵyndarynyń belsendiligi tómen eken. Olardyń úlesi 1 paıyzǵa zorǵa jetedi.
О́tken jyly servıstegi eń qymbat habarlandyrý quny 800 mln teńgeni qurapty. Saǵatyna 300 tekshe metr beton óndiretin zaýyttyń ıesi osyndaı baǵany kórsetken. Buǵan qosa «Qaraǵandy» qonaqúıin 280 mln teńgege satý týraly habarlama ornalastyrylǵan. Úshtikti quny 260 mln teńge bolatyn burǵylaý qondyrǵysynyń satylymy túıindep tur.
Kez kelgen maýsymda suranystan túspeıtin eń tanymal sanattardyń kóshin «páter» sanaty bastap tur. Kóktem men jazda velosıpedterge degen suranys artady eken. Sondaı-aq turǵyndar qysta, jazda jáne kúzde onlaın-servıske jumys izdeý úshin úzdiksiz kiretini belgili boldy.
Satýshylar «telefondardy satý», «tasymaldaý» jáne «avtokólik bólshekterin satý» sanattary boıynsha kóp habarlandyrý ornalastyratyny anyqtaldy.
Kóbinese ınternet-dúkender servıste uıaly telefondar/smartfondar, jabdyqtar men shıkizattar, kompıýterler satý, páterlerdi uzaq merzimge jalǵa berý qyzmetterin, qurylys, dızaın jáne polıgrafııa qyzmetterin júzege asyrypty. Sondaı-aq daıyn bıznesti satý, qarjylyq jáne jıhaz jasaý qyzmetterin usynǵan.
OLX.kz-tegi habarlandyrýlarǵa den qoısaq, ótken jyldyń qorytyndysy boıynsha barlyq sanattaǵy jyljymaıtyn múliktiń sharshy metri ortasha eseppen 20 paıyzǵa, al kommersııalyq úı-jaılardyń quny ortasha eseppen 22 paıyzǵa ósken. Al kólik naryǵy barlyq sanat boıynsha habarlandyrýlar sanynyń tómendeýin kórsetken. Qaıtalama naryqta otandyq jeńil avtomobıldiń ortasha quny 750 myń teńgeni, sheteldik markalar 1,5 mln teńgeni quraǵan.
Eńbek naryǵynda jumys izdeýshilerdiń suranystary men jumys berýshilerdiń usynystary arasyndaǵy alshaqtyq alystaı túsken. Qashyqtan jumys izdeýshiler sany 32 paıyzǵa ósse, al qashyqtan jumys usynatyndardyń úlesi tipti azaıyp ketken – 2 paıyz. Paıdalanýshylardyń ózderine qolaıly kestemen jumys isteýge qatysty suranystary 45 paıyzǵa ósken. Bul rette qolaıly kestemen jumys usynatyndar aıtarlyqtaı azaıǵan – úlesi 6 paıyz. Vahtalyq jumysqa degen suranys birneshe jyl qatarynan joǵary bolyp tur.
