Aýyldyń tirligi tehnıkasyz bitpeıdi. Keńes ókimetinen qalǵan eski-qusqy tehnıkadan arylyp, jańasyn alý sharýa baqqan aǵaıyn úshin áli de bolsyn qol jetpes arman. Sebebi búginde aýylsharýashylyq kólikteriniń baǵasy aspandap tur. Ony ala berýge ekiniń biriniń shamasy jetpeıdi. Osyndaı ýaqytta baǵasy qoljetimdi ári senimdi otandyq tehnıkalarǵa basymdyq berilgeni abzal.
Buǵan deıin de jazǵanymyzdaı, «Dımash» jeke kásiporny «Bıznestiń jol kartasy-2025» baǵdarlamasy arqyly utyp alǵan 5 mln teńge grantty paıdalanyp, byltyr shaǵyn traktorlar óndirisin jolǵa qoıdy. Ámbebap tehnıka 15 túrli jumysty atqara alady. Shópti shaýyp, jınaý, kartop otyrǵyzý, qysta qar kúreý sııaqty taǵysyn taǵy aýyldyń bitpeıtin sharýalaryn lezde dóńgeletip tastaýǵa bolady. Tehnıkaǵa qajet tıeýish shómish, qar kúregishter, arnaıy ashalar qosymsha jasalady. Traktorǵa búginde arnaıy patent alynǵan. Injenerlik turǵydan arzan ári tıimdi tehnıka Qytaıda qurastyrylǵan shaǵyn traktorlardan eki esege jýyq arzan. Bireýiniń quny shamamen 3,6 mln teńge turady.
«Dımash» jeke kásipornynyń basshysy Erlik Taıshybaev óndiristik bazada 2 shaǵyn traktor qurastyrylyp shyqqanyn aıtqan edi. Byltyrǵy jyl sońynda kóliktiń ekeýi de satylyp ketti.
«Jumyskerdiń» biri qazirgi kúni oblys ortalyǵyndaǵy «Jailau» fermerlik bazarynda júr. Osydan bir aı buryn satyp alynǵan tehnıka yńǵaıly ári utqyr deıdi ondaǵy qyzmetkerler. «Pavlodar» ÁKK» AQ ókili Arman Asıpov fermerlik bazar alǵash ashylǵan kúnnen bastap aýmaqtaǵy saýda pavılondaryn ornalastyrý, qar tazalaý jumystary shaǵyn traktordyń kómegimen júzege asyp jatqanyn aıtady.
– Qujatynda júk kótergishtigi 300 kg dep jazylǵan. Deıturǵanmen, tehnıka 360 kılogramdyq júkterdi qınalmaı ala beredi. Shaǵyn shómishi men qyrǵyshy óte qolaıly. Qazir shtatqa traktorıst alǵanbyz. Qozǵaltqyshy kúni boıy jumys istegende nebári 5 lıtr benzındi jaǵatynyn aıtady. Bul jaǵynan alǵanda biz úshin tıimdi, – deıdi ol.
Pavlodarlyq traktordyń taǵy birin ótken kúzde Aqmola oblysynan bir sharýa kelip satyp aldy. Sandyqtaý aýdany Vladımırovka aýylynyń turǵyny Valerıı Vznıkın baǵasy arzan ári kópfýnksııaly shaǵyn traktorǵa qol jetkizgenine qýanyshty. Aıtýynsha, bul tehnıkany ınternetten izdep, áreń taýypty. Qytaıda shyǵarylǵan balamalaryn alaıyn dese, baǵasy tym qymbat ári aqaý shyqsa qosymsha bólshekterin izdep tabý qıyn. Qozǵaltqyshy men konstrýksııasy qarapaıym kólik qazirgi kúni qora-jaıdaǵy maldy jaıǵaýǵa, aýladaǵy qardy tazalaýda taptyrmas tehnıka bolyp tur.
– Traktor óte shaǵyn, kez kelgen ǵımarattyń esiginen enip ketedi. Jaqtaýy da myqty, aýyr júkterdi kótere beredi. Úı mańyndaǵy jumystardy onyń kómegimen tez atqaryp shyǵamyn. Maldyń astynan shyqqan tezekti aýlaqqa aparyp tógý, qar tazalaý, shóp tasý sharýalarynyń barlyǵy – sonyń moınynda. Bir jaqsysy, qytaılyq traktorlardaǵy sekildi kúrdeli gıdromotor, túrli qymbat rezeńkeler men tehnıkalyq shlangiler munda joq, qarapaıym júıe ornatylǵan. Bólshekteri isten shyqsa, jańasy bazarda arzan turady. Gıdravlıkalyq júıesine quıylǵan tehnıkalyq maı da qarapaıym ári arzan eken, – deıdi sharýa.
Buryn «Belarýs» traktoryn tizgindegen V.Vznıkın aýyl sharýashylyǵy úshin óte tıimdi mundaı otandyq kólikterdi satýǵa memlekettiń ózi múddeli bolýy kerek dep esepteıdi. Úkimet shetelden keletin tehnıkany satyp alýǵa mıllıondap sýbsıdııa tólegenshe, osyndaı baǵasy arzan otandyq quraldarǵa basymdyq bergeni abzal.
Osydan birer jyl buryn sheteldik áldebir kompanııamen kelisimshart negizinde oblys ortalyǵynda Qytaı eliniń mashınalary qurastyrylady dep kútilgen edi. «Pavlodar» arnaıy ekonomıkalyq aımaǵynda salynýǵa tıis óndiris jobasy sol kúıi qaǵaz betinde ǵana qaldy. Bul turǵydan alǵanda aýyl kásipkeriniń batyl bastamasy qoshemetteýge turarlyq.
Erlik Taıshybaev búginde ózi qurastyratyn tehnıkany satýǵa memleket tarapynan kómek bolsa degen nıetin jetkizdi. «Jumysker» quny sýbsıdııalanatyn aýylsharýashylyq tehnıkalarynyń tizbesine ense, sonyń ózi Maı aýdanyndaǵy traktor óndirisine úlken sep bolary sózsiz.
Pavlodar oblysy,
Maı aýdany
