19 jastaǵy Qazaqstan sportshysy kishi tramplınnen sekirýdiń (K-90) alǵashqy jattyǵýynda 257.3 upaı jınap, birinshi baǵdarlamany ekinshi orynmen aıaqtady. Bul synda jerlesimizden nebári 2,3 upaı kóp oljalaǵan aýstrııalyq Maksımılıan Lıner birinshi boldy. Fınaldaǵy ekinshi jattyǵýyn aına-qatesiz oryndap, tóreshiler tarapynan eń joǵary upaıǵa ıe bolǵan Danıl Vasılev 130.1 upaımen 2023 jylǵy qysqy Ýnıversıadanyń jeńimpazy atandy. Kúmis júlde ekinshi jattyǵýda 119.0 upaı jınaǵan aýstrııalyq atlet Maksımılıan Lınerdiń enshisinde ketse, qola júlde taǵy bir aýstrııalyq sportshy Paskal Kahoferge buıyrdy. Ol birinshi jattyǵýda – 126.2, ekinshi jattyǵýda 122.6 upaı jınady.
Shańǵymen tuǵyrdan sekirý jarysynyń fınalynda Danıl Vasılevten bólek, Qazaqstannyń taǵy úsh sportshysy bas júlde úshin synǵa tústi. Qysqy Olımpııa oıyndarynyń qatysýshysy, el birinshiliginiń jeńimpazy Sergeı Tkachenko jarysty 7-orynmen aıaqtasa, Nıkıta Devıatkın 9-shy, Svıatoslav Nazarenko 21-shi, Maǵjan Amangeldiuly 22-satydan kórindi.
Sondaı-aq keshe mánerlep syrǵanaýshy Mıhaıl Shaıdorov qola júldege qol sozym qalǵan jerde súrindi. Byltyr Estonııa astanasy Tallınde ótken jasóspirimder arasyndaǵy álem chempıonatynda kúmispen kúptelgen jerlesimiz qysqa baǵdarlamada 6-shy, al erkin baǵdarlamada 3-shi nátıje kórsetip, qossaıysta jalpy 231,08 upaı jınady. Biraq otandasymyzdyń qola júldeni moınyna taǵýyna nebári 0,25 upaı jetpeı qaldy. Mánerlep syrǵanaýdyń altyny men kúmisin japonııalyq sportshylar ıelendi. Bas júldeni eki baǵdarlamada 274.86 upaı jınaǵan 2016 jylǵy jasóspirimder Olımpıadasynyń jeńimpazy Sota Iаmamoto jeńip alsa, kúmis medaldi byltyrǵy jasóspirimder arasyndaǵy álem birinshiliginiń qola júldegeri Tasýıa Sýboı (243.82 upaı) oljalady. Al qola júlde ıtalııalyq mánerlep syrǵanaýshy Nıkolaı Memolaǵa (231.33) buıyrdy. Mıhaıl Shaıdorov 231.08 upaımen úzdik tórttiktiń qatarynan kórindi. Taǵy bir jerlesimiz Dıas Jırenbaev 196.41 upaımen 11-orynǵa taban tiredi. Jalpy, mánerlep syrǵanaýdan erler arasyndaǵy jarysqa 19 eldiń 31 sportshysy qatysty.
Sonymen qatar shaıbaly hokkeıden Qazaqstannyń stýdentter quramasy qatarynan tórtinshi matchta jeńiske jetip, merziminen buryn pleı-off kezeńine joldama aldy. Jerlesterimiz bul týrda týrnır kestesinde ekinshi orynda turǵan Slovakııa hokkeıshilerin 4:0 esebimen san soqtyrdy. Qazaqstan quramasy sapynan Maksım Mýhametov (8-mınýt), Stanıslav Aleksandrov (10), Batyrlan Muratov (20) jáne Oleg Boıko (29) mergendigimen kózge tústi. Slovakııa quramasy buǵan deıin Majarstandy – 4:0, Ulybrıtanııany – 14:0, AQSh-ty 5:2 esebimen jeńgen edi. Endi Qazaqstan stýdentter quramasy búgin týrnır kestesinde úshinshi orynda turǵan AQSh hokkeıshilerimen kezdesedi.
Shaıbaly hokkeıden Qazaqstan stýdentter quramasy ár jyldardaǵy qysqy Ýnıversıadalarda sátti óner kórsetip keledi. Máselen, jerlesterimiz 1995 jyly Ispanııanyń Haka qalasyndaǵy dúbirli dodada chempıon atansa, 1993, 2013, 2015, 2017 jyldary fınalda súrinip, kúmis júlde enshiledi. Al 2007 jyly qola júldeni qanaǵat tutqan bolatyn.
Ýnıversıadanyń besinshi jarys kúninen keıin jalpykomandalyq esepte ádettegideı Japonııa sportshylary kósh bastap tur. Kúnshyǵys eliniń ókilderi búginge deıin 9 altyn, 6 kúmis, 2 qola medal oljalap úlgerdi. Ekinshi oryndaǵy Fransııa quramasynyń enshisinde 2 altyn, 3 kúmis, 4 qola medal bar. Úshinshi oryndy 2 altyn, 1 kúmis jáne 1 qolamen Chehııa sportshylary túıindep tur. Al Qazaqstan 2 altyn medalmen jalpy esepte 6-orynǵa kóterildi.
Qysqy Ýnıversıada básekeleri 22 qańtarǵa deıin jalǵasady.
