Áskerı ant – jas sarbazdyń ómirindegi asa jaýapty sáttiń biri. Ulttyq ulannyń «Batys» tobyna qaraıtyn 5517 áskerı bólimine kelip túsken sarbazdar bir aı boıy oqý pýnkitinde shynyǵyp, áskerı ómirdiń qyr-syrymen tanysyp, saptyq daıyndyqtan ótken. Keń baıtaq Otanymyzdyń ár shetinen – Almaty, Aqtóbe, Mańǵystaý, Atyraý, Aqmola oblystarynan jınalǵan jaýyngerler munda bir úıdiń balasyndaı bolyp ketti. О́ıtkeni olardyń maqsaty bir – eldiń qaýipsizdigi men aýmaqtyq tutastyǵyn qorǵaý úshin minsiz qyzmet etý. Saltanatty ant berý rásiminen keıin jas býyn birden er jetip, eseıip ketkendeı.
Áskerı bólimniń Jaýyngerlik Týy alańǵa shyǵarylǵan soń sarbazdar sap túzep kelip, áskerı ant qabyldaýǵa kirisip te ketti. Saltanatty jıynǵa quqyq qorǵaý organdarynyń laýazymdy tulǵalary, Ulttyq ulan ardagerleri qatysyp, ant qabyldaǵan jaýyngerlerdi erekshe jaýapty sátimen quttyqtady.
– Elimizdi, Otanymyzdy qorǵaý – árbir azamattyń eń qasıetti boryshy. О́ziniń týyp ósken elin, jerin qorǵap, naǵyz sarbaz bolý ońaı emes. Ol úshin ár sarbaz ózine qoıylǵan jaýyngerlik tapsyrmany oryndaýǵa jan-jaqty daıyn bolý kerek. Al áskerı ant qabyldaý degenimiz – Otanyna, halqyna jáne zańdy túrde saılanǵan Prezıdentine aqtyq demi qalǵansha adal qyzmet etý degen sóz. Búginnen bastap sizderge jaýapkershiligi mol mańyzdy mindetter júktelgeli tur. Men osy bólimniń komandıri retinde sizderge júktelgen jaýyngerlik tapsyrmalardy adal da abyroımen atqaratyndaryńyzǵa tolyqtaı senemin, – dedi 5517 áskerı bólim komandıri, podpolkovnık Saǵyndyq Alqaıdarov.
Is-sharaǵa jas sarbazdardyń ata-analary da arnaıy kelgen. Qatardaǵy jaýynger Talǵar Nurqabdenniń ákesi Aıtjan Nurqabden sóz alyp, jaýyngerlerge «Qabyldaǵan áskerı anttaryńyzǵa berik bolyp, qyzmetterińizdi abyroımen atqaryńyzdar. Ata-analaryńyz ben baýyrlaryńyzdyń ortasyna aman-esen kelýlerińizge tilektespin», degen tilegin aıtty.
Batys Qazaqstan oblysy
