Oblys ákimdiginiń baspasóz qyzmeti taratqan derekterge zer salsaq, aýdandyq elektr jelilerin taratý mekemeleri tarapynan 270 nysanda tıisti deńgeıde jumystar júrgizilgen. Nátıjesinde, 100 shaqyrym jeliniń 91-inde qalpyna keltirý jumystary aıaqtalǵan. Qalǵan jumystar jalǵasyn taýyp jatyr. Búgingi tańda Jańatas qalasynyń jylytý, aýyzsý jáne káriz júıeleri qalypty rejimde jumys istep tur.
Tótenshe jaǵdaı kezinde Jańatas qalasyndaǵy elektr baǵanalary qulap, elektr jelileri tıisti kerneýdi taratýda kedergi týyndaǵan. Soǵan baılanysty «JańatasSýJylý» MKK jumysyn toqtatýǵa májbúr bolǵan. Sol kezde qazandyqtyń jeke generatorlarynyń qýaty aınalym-sorǵylarynyń qyzmetin qalypqa keltirgenshe Astanadan jetkizilgen iri dızel generatory paıdalanylyp, qalany aýyzsýmen qamtý júzege asyryldy.
Talas aýdany Qarataý qalasy boıynsha zardap shekken 14 ǵımarattyń 13-inde kúrdeli jóndeý (shatyrlaryn tolyq aýystyrý), al 1 nysanda aǵymdaǵy jóndeý jumystary qarqyndy júrgizilýde. Barlyq nysan boıynsha qaıta montajdaý jumystary aıaqtalyp, qajetti qurylys materıaldary jetkizilip, jóndeý jumystary kún sanap támamdalyp keledi. Qarataýlyqtarǵa sý, jaryq, jylý úzdiksiz berilýde. Bul jaǵynan eshqandaı másele joq.
Budan bólek, aýdandaǵy Eseıhan aýylyndaǵy elektr jelileri tolyq qalpyna keltirilip, 170 abonent jaryqpen qamtylsa, Qasqabulaq aýylyndaǵy 143 abonent jáne Qaraoı aýylyndaǵy 76 abonenttiń barlyǵyna dızel generatorlary arqyly elektr qýaty jetkizilgen. Jergilikti halyq qalypty ómir aǵymyna túskenine bek qýanyshty.
Búgingi tańda Eseıhan aýylynan Qaraoı aýylyna deıingi 18 shaqyrymdaǵy jaramsyz bolyp qalǵan 40 elektr baǵanasyn qalpyna keltirý jumystary qolǵa alynǵan. Oǵan barlyǵy 56 adam jáne 11 tehnıka jumyldyrylǵan. Qaraoı aýylynyń ishki elektr júıesi jaryq berýge tolyq daıyn. Qysqasy, eldi mekendegi máseleni tolyqtaı sheshýdiń barlyq alǵysharty qarastyrylyp otyr.
Eseıhan-Qasqabulaq baǵytyndaǵy VL-10 KVT elektr jelisiniń tolyq jaramsyz bolyp qalýyna baılanysty elektr júıeleriniń materıaldyq jabdyqtary jınaqtalyp, tıisti jumystar atqarylyp jatyr.
Bul eldi mekenderge qoıylǵan generatorlar esebinen aýyzsý turaqty berilip tur. Negizgi aýyzsý berý stansasynyń elektr jelilerin qalpyna keltirilý jumystary qarqyndy túrde júrgizilip jatyr. Qazirgi kezde turǵyndar tarapynan azyq-túlik ónimderine degen suranysqa saı qamtý sharalary myqtap qolǵa alynǵan. Bul máselede eshqandaı qıyndyq týyndap turǵan joq. Búginde atalǵan aýdandardaǵy qatty daýyldan kelgen shyǵyn kólemi eseptelip jatyr. Aldaǵy ýaqytta shyǵyn kólemi tolyqtaı naqtylanatyn bolady.
Jambyl oblysy
