Áleýmettik medısınalyq saqtandyrý qory buǵan túsnikteme berdi.
«Mindetti áleýmettik medısınalyq saqtandyrýǵa baǵyttalatyn jarnalar men aýdarymdardyń mólsheri zańda bekitilgen, olar ózgerissiz qaldy. Alaıda AEK jáne ETJ sııaqty bazalyq qarjylyq kórsetkishterdiń ulǵaıýyna baılanysty ózin-ózi jumyspen qamtıtyndar men jeke kásipkerler úshin jarnalar somasy birshama ózgeredi», dep qysqa qaıyrdy qor ókilderi.
Osylaısha, 2023 jylǵy jarnalar somasy:
- Jumys berýshiler úshin – jalaqy mólsheriniń 3%-y, alaıda jalaqy mólsheri 10 ETJ-dan (700 myń teńge) aspaýy tıis. Jumys berýshiniń eń joǵary aýdarymy - aıyna 21 myń teńge;
- Jaldamaly jumyskerler men MJÁ sharty boıynsha jumyskerler – óz tabysynyń 2%, múmkin bolatyn eń joǵary jarna - 14 myń teńge;
- Jeke kásipkerler úshin – 1,4 ETJ-nyń 5%-y, ıaǵnı 4 900 teńge;
- О́zin-ózi jumyspen qamtyǵan azamattar (BJT tóleýshiler) – respýblıkalyq jáne oblystyq mańyzy bar qalalardyń turǵyndary úshin BJT mólsheri 1 AEK, ıaǵnı 3 450 teńge; qalǵan eldi mekenderdiń turǵyndary úshin BJT 0,5 AEK, ıaǵnı 1 725 teńgege teń;
- Derbes tóleýshiler – 1 ETJ-nyń 5%-y, ıaǵnı 3 500 teńge;
- Arnaıy salyq rejımderin qoldanatyn mıkro jáne shaǵyn kásipkerlik sýbektileri – jumys berýshiler úshin biryńǵaı tólem stavkasynyń 15%-y, al qyzmetkerler úshin 10%-y.
Esterińizge sala keteıik, bıyl ETJ – 70 myń teńge, al AEK – 3 450 teńge bolyp belgilendi. Gúlshahra SANSYZBAI
