Oqýshylar ózderi oılap tapqan «aqyldy» qurylǵyǵa avtorlyq quqyq alyp, endi saýdaǵa shyǵarý jaǵyn oılastyryp jatyr. О́nertapqysh qyzdardyń ekeýi de 12 «S» synybynda oqıdy. Sabaqtan tys ýaqytta ónertabyspen aınalysady.
– «EWA» – erekshe ıntellektýaldy-aqparattyq kómekshi. Bul aqyldy dınamıktiń kórsetetin qyzmeti de san alýan. Mysaly, bólmedegi aýa temperatýrasyn, ondaǵy gaz mólsherin anyqtaıdy. Ony óndiriste de, úıde de qoldanýǵa bolady. «EWA» matematıka, fızıka, hımııa, bıologııa pánderi boıynsha esepterdi sheship, tapsyrma oryndaı alady. Sonymen qatar ýıkıpedııadaǵy málimetterdi baıandap, ertegi aıtady. Túrli buıryqtardy oryndap, úıde sham jaǵyp, óshire alady, – deıdi Ámına Ysqaqova.
Jas ónertapqyshtar «EWA»-ny 2-3 aıdyń ishinde jasap shyǵarǵan. Ýaqyttyń kóbi aqparat qoryn júkteýge jáne qazaq tilin engizýge ketken kórinedi.
– Biz áý basta ózimiz jasap jatqan qurylǵy mindetti túrde qazaqsha túsinip, sóıleı alýy kerek degen maqsat qoıdyq. Qurylǵy kompıýter arqyly daýystaıdy. Bul daýystyń bárin adamǵa oqytýǵa shamamyz jetpedi. Mundaı tehnıkaǵa adam daýsyn engizý úshin kásibı dıktormen 270 saǵat boıy jumys isteý kerek. Oǵan bizdiń ýaqytymyz da, qarjymyz da bolmady. Sondyqtan adamnyń daýsyn kompıýterdiń daýsyna almastyrdyq, – deıdi Sofııa Sınısına.
Qostanaı oblysy
