Júlde qory 51,5 mıllıon AQSh dollaryn quraıtyn jarystyń alǵashqy kezeńinde dúnıejúzilik reıtıngte 48-orynda turǵan ıtalııalyq Elızabetta Kochcharettony eki sette – 7:5, 6:3 esebimen tize búktirgen Rybakına ekinshi aınalymda álemdik reıtıngte 104-orynda turǵan slovenııalyq Kaııa Iývanmen kezdesti. Birinshi partııada Qazaqstan tennısshisi myqtylyq tanytyp, qarsylasyna esh múmkindik qaldyrmady – 6:2. Ekinshi sette de jerlesimiz bilgeninen jańylǵan joq – 6:1. Nebári bir saǵatqa sozylǵan básekede Elena 5 eıs jasap, 8 breık-poınttyń tórteýin paıdalana bildi.
Endi E.Rybakına tórtinshi aınalymǵa shyǵý úshin búgin álemniń 11-raketkasy amerıkalyq Danıel Kollınzben sheberlik baıqasady. Elena jýyrda D.Kollınzdi Adelaıdadaǵy týrnırde 5:7, 6:2, 6:3 esebimen utqan edi. Al 2021 jyly San-Hosede (AQSh) ótken dodada D.Kollınz Rybakınadan eki sette – 7:6, 7:6 esebimen basym túsken bolatyn. О́kinishke qaraı, qyzdar básekesinde baq synap jatqan taǵy bir otandasymyz Iýlııa Pýtınseva keshe chehııalyq Karolına Plıshkovadan jeńilip, jarys jolynan shyǵyp qaldy – 6:0, 7:5.
