Mazmundy is-sharaǵa Memleket tarıhy ınstıtýtynyń dırektory, tarıh ǵylymdarynyń doktory, professor Erkin Ábil, Qazaqstan Kompozıtorlar odaǵynyń tóraǵasy, kompozıtor Serikjan Ábdinurov, tehnıka ǵylymdarynyń kandıdaty Serik Sadyqov, qoǵam qaıratkeri Marat Mustafın, jazýshy Kamal Álpeıisova, Qazaqstannyń eńbek sińirgen qaıratkeri, kúıshi Anar Muzdahanova jáne taǵy basqa zııaly qaýym ókilderi qatysty.
Brendbýk avtory – sýretshi, ıllıýstrator, dızaıner, Qazaqstan Sýretshiler odaǵynyń múshesi Almas Syrǵabaı. Batyrdyń 150 jyldyq mereıtoıyna arnalǵan logotıp arnaıy qurylǵan komıssııanyń talqylaýynan ótken. Ol eki túrli nusqada daıyndaldy. Birinshisinde – Qazaqstannyń halyq sýretshi Ábilhan Qasteevtiń dańqty erdiń shynaıy beınesin kóz aldymyzǵa ákelgen portreti negizge alynsa, ekinshisi – Almatydaǵy Amangeldi Imanovtyń at ústindegi eskertkishiniń (músinshi – H.B.Asqar-Sarydja, sáýletshi – T.Básenov, 1947) nusqasynda jasaldy.
Tanystyrylymda Qazaqstan Kompozıtorlar odaǵynyń tóraǵasy Serikjan Ábdinurov ózi basqaryp otyrǵan odaq aıasynda tuǵyrly tulǵanyń 150 jyldyǵyna baılanysty birqatar is-shara josparlanyp otyrǵanyn jetkizdi.
«Kásibı mýzykant retinde batyrdyń mereıtoıynan shet qalmaý úshin, erlik pen órlikti dáripteıtin bir shyǵarmany aıaqtadym. Sony Amangeldi atamyzǵa arnaımyn. Odan keıin aldaǵy sáýir aıynda Astana qalasy ákimdiginiń Erkeǵalı Rahmadıev atyndaǵy memlettik akademııalyq fılarmonııasymen birlesip, «Batyrdyń bıik tulǵasy» atty sazdy kesh ótkizemiz. Osy tusta aıta keter bir jaıt bar: kezinde Amangeldi Imanov týraly kóptegen mýzykalyq shyǵarma jazyldy. Sonyń ishinde kórnekti kompozıtorlar M.Tólebaev pen E.Brýsılovskııdiń «Amangeldi» operasy men qytaı kompozıtory Sı Sınhaıdyń «Amangeldi» sımfonııasyn erekshe aıtýǵa bolady. Sonymen birge Ábilahat Espaev, Latıf Hamıdı, Dmıtrıı Masýsın jáne ataqty kúıshi Súgirdiń batyrǵa arnaǵan týyndylary Qazaq radıosynyń «altyn qorynda» saqtalǵan. Osy shyǵarmalardyń deni atalǵan keshte jańa dybysta árlenip, kórermenge usynylady», dedi ol.
Sondaı-aq «Amangeldi Iman» qoǵamdyq qorynyń jetekshisi Tolqyn Sultan tekti áýlettiń erlik joldaryna toqtaldy. «Akademık Qanysh Sátbaev bir maqalasynda halyq batyrynyń erligine toqtalyp, onyń atasy Imannyń Kenesary hannyń senimdi serikteriniń biri bolǵanyn aıtady. Jalpy, Iman batyr baýyrlarymen, balalarymen han Kene bastaǵan azattyq jolyndaǵy uly kúrestiń jalyndy jaýyngerleri boldy. Qazaq jýrnalıstıkasynyń damýyna úlesin qosqan Amangeldiniń bel balasy Ramazan da óz erkimen maıdanǵa attanyp, sonda kóz jumdy. Osydan-aq bul áýlettiń negizinde tektilik, batyrlyq jatqanyn bilesiz. Amangeldi Imanov – 1916 jylǵy Torǵaıdaǵy ult azattyq kóterilisiniń bas sardary ǵana emes, ol halqynyń qamqorshysy, arqasúıeri boldy», dedi batyr urpaǵy.
Sonymen qatar is-shara barysynda kúıshi Anar Muzdahanova ákesi Aıtbaı Muzdahanovtyń «Amangeldi dúbiri» atty týyndysyn jınalǵandarǵa tartý etti.
