«Tıimdi depozıt» pıramıdasyn qurýshylar jaza merzimin ótegennen keıin de qarjylyq ne kommersııalyq uıymdarda basshylyq qyzmet atqara almaıdy. Sot úkimi boıynsha sottalýshylar zardap shekkenderdiń qarajatyn qaıtaryp berýge tıis. Alaıaqtardyń áreketinen zardap shekken 764 adam 4 mıllıard teńge qarjysynan aıyrylǵan. 840 tomnan turatyn qylmystyq iste alaıaqtardyń qarjy pıramıdasy ádisimen jurttan qolma-qol aqsha qabyldaǵany, tipti avtokólikter men jeke adamdardyń turǵyn úılerin qymbatqa satyp berýge ýáde etkeni kórsetilgen. Kóp tabys tabamyz dep aldanǵan jurt alaıaqtardyń keńsesine kelip, jeke kólikter men turǵyn úılerin saýdaǵa shyǵarýǵa óz attarynan senimhat rásimdegen. Aqyr aıaǵy satylymǵa shyqqan múlik te joq, ne qoldaryna qarjysy da túspeı san soǵyp qaldy. Tergeý kezinde alaıaqtarǵa qatysty qanshama dálel jınalsa da, sot barysynda aıyptalǵandar kinálaryn moıyndamady. Ne tergeý kezinde, ne sot úderisterinde jurttan jınalǵan 4 mıllıard teńgeniń qaıda ketkendigi anyqtalmady.
«Tıimdi depozıt» isimen bir kezde Aqtóbe qalalyq №2 sotynda «Sentr Fınans» pıramıdasyn uıymdastyrǵan 31 jastaǵy Berik Tımınge qatysty sot júrip jatyr. 2019 jyldyń jeltoqsanynan 2020 jyldyń aqpanyna deıin eki júz adam osy pıramıdaǵa 1 mıllıard teńgeden astam qarjy salǵan. Eki jarym jyl buryn Berik Tımın «Sentr Fınans» seriktestigin satyp alyp, jarǵysynda kommersııalyq qyzmetpen aınalysatynyn kórsete otyryp, qaıta tirkeýden ótkizedi. Sodan keıin joǵary jalaqyǵa qyzmetkerdi jumysqa alatyndyǵy týraly jarnama beredi. Jurttan salym qabyldap, aı saıyn 40 paıyzdyq mólsherlemede syıaqy berýge ýáde etken. Bul jerde adamdardan qabyldanatyn eń tómengi salym mólsheri – 300 myń, eń joǵarǵysy 2 mıllıon 100 myń teńge dep belgilengen. Berik Tımın de alaıaq áriptesteri sekildi jurttyń kóligin naryqtyq baǵadan 30 paıyz joǵary baǵaǵa satyp berýge ýáde etedi. Kólik ıesimen kelisimshart jasasyp, olar jyljymaly múligin saýdalaýǵa senip tapsyrǵan. Alaıaq kólik ıesiniń qolyna az mólsherde qarjy berip, qalǵan somany kólik satylǵan soń berýge ýáde etken. Ýaqyt óte beredi, ýáde etilgen qarjy qolyna tımegen soń kólik ıesi Berik Tımınniń keńsesine kelgende esh adamdy tappaıdy, eshbiri telefon tutqasyn kótermeıdi. Zardap shekkender ózderiniń qalaı aldanǵandaryn baıandaǵanymen, sot úderisinde alaıaqtar ózderin aıypty dep sezinbedi. Berik Tımınnen aldanǵan 200 aqtóbelik bir mıllıard teńgeni qaıda jibergenin bilgisi kelse de, bul suraqtyń jaýaby tabylmady.
Aıta ketý kerek, Aqtóbede bir jyl buryn dál osy ýaqytta birneshe qarjy pıramıdasyn uıymdastyrǵandarǵa ashyq sot bolyp, onnan astam adam uzaq merzimge sottalyp ketken edi. О́kinishke qaraı, qolyndaǵy qarjysynan aıyrylǵan, baspanasyn ne kóligin satyp beremin degenderge ońbaı aldanǵan adamdardyń kóptigine qaramastan, qarjy pıramıdalaryna senetinder sany áli azaımaı otyr.
Aqtóbe oblysy
