El kóleminde sońǵy jyldary bul baǵytta ilkimdi ister joq deýge kelmeıdi. Múmkindigi shekteýli jandar kózge kórinbeıtin shekara sheginde qalyp qoımaýy kerek. Osy oraıda elimizde ońaltý ortalyqtary jumys isteıdi. Budan birer jyl buryn balalarǵa arnalǵan mundaı ortalyqtardyń kemdigi jıi aıtylatyn. Qazirgi tańda bul basty nazarda. Balalarǵa arnalǵan sondaı ortalyqtyń biri Balqash qalasynda ornalasqan.
Atalǵan ortalyq Qaraǵandy oblysynyń aýdan-qalalarynan kelgen múmkindigi shekteýli balalarǵa kómek kórsetedi. Bul – mamandandyrylǵan ortalyq. Munda qabyldanatyn balalardyń jas shamasy – 1,5 jastan bastap, 18 jasqa deıingi aralyq.
Ońaltý ortalyǵyna arnalǵan ǵımarat tolyqtaı jańǵyrdy. Injenerlik jelileri jańadan júrgizilip, qoljetimdi qaǵıdatyna saı jóndeý jumystary jasaldy. Baspaldaqtarǵa arnaıy kótergishter de ornatyldy. Basshylyqtyń málimdeýinshe, ortalyq balalarǵa qyzmet kórsetýge ázir.
– Ortalyqtyń em-dom jasaıtyn mamandary túgel. Dárigerler, muǵalimder qabyldandy. Atap aıtqanda, ortalyqta pedıatr, ortoped-travmatolog, reabılıtolog, psıholog, nevropatolog, logoped, defektolog, mýzyka, dene shynyqtyrý muǵalimderi jáne basqa mamandar balalarmen jumys isteıtin bolady.
Jattyǵý terapııasy, fızıoterapııa, massaj bólmeleri jabdyqtalǵan. Montessorı bólmesi daıyn. Ystyq vanna, galvanızasııa, elektrofarez, magnıtterapııa sekildi apparattar bar. Jatyn bólmelerge fýnksıonaldy kereýetter qoıyldy. Pasıentterge kúnine bes ret ystyq tamaq beriledi, – deıdi Ońaltý ortalyǵy dırektorynyń mindetin atqarýshy Daryn Áýbákirov.
Ortalyqta 50 oryn bar. Densaýlyǵyndaǵy túrli kórsetkishterine baılanysty balalar jarty jylǵa deıin ortalyqta em-shara qabyldaı alady. Ońaltý keshendi túrde júrgiziledi. Iаǵnı onda medısınalyq, áleýmettik jáne pedagogıkalyq úderister qamtylady. Mamandar tarapynan kórsetiletin qyzmettiń barlyǵy tegin. Búginde Aleumet.egov áleýmettik portaly arqyly ońaltýǵa ótinish bildirgen balalardy qabyldaý júrip jatyr.
Al resmı derekter boıynsha Qaraǵandy oblysynda múmkindigi shekteýli balalar sany 5 myńnan asyp jyǵylady.
Qaraǵandy oblysy,
Balqash qalasy
