Juldyzdar jaryǵy

Astana kúni qarsańynda elordada otandyq kásibı án jobasy – «Astana juldyzy» baıqaýy osymen ekinshi márte ótkeli otyr. Qala ákim­diginiń bastamasymen dúnıege kelgen ulttyq mýzyka báıgesin uıym­dastyrýda «Adam Media Group» kompanııa­sy­nyń atqarar róli orasan zor. Jaqynda Beıbitshilik jáne kelisim saraıynda ótken baspasóz máslıha­tynda mádenıet pen óner ókilderi ulttyq mýzyka saıysy týraly óz oıla­rymen bólisken edi. Aıta ketý kerek, «Astana jul­dyzy» jobasy alǵash ret Asta­na kúniniń 15 jyldyǵyna oraı uıymdastyrylǵan bolatyn. Kásibı mýzykanttar arasyn­da keń qoldaýǵa ıe bolǵan básekeli báıgeniń ulttyq án ónerin damy­týdaǵy rólin elep-ekshegen uıym­dastyrýshylar saıysty jyl saıyn ótkizýge sheshim qabyldap otyr. Jobanyń eń basty ereksheligi – júldegerlerdi tańdaý kezindegi kásibı sheberliktiń myqty bolýy. Básekeli báıgede baqtaryn synaıtyn 350 úmitkerdiń sheberligine 100 bilikti sarapshy-maman laıyqty baǵasyn beredi dep kútilýde. Olardyń arasynda elimizge eńbegi sińgen ártister, prodıýserler, kompozıtorlar, aqyndar, án men sán óndirisiniń mamandary, sondaı-aq BAQ ókilderi bar. Qazirgi tańda daýys berýdiń osy júıesi halyqaralyq kólemde paıdalanylyp kele jatqandyqtan, «Astana juldyzy» án baıqaýy álemdegi eń tanymal mýzykalyq báıge ere­jesine saı júrgiziledi dep eseptelýde. Án álemindegi bedeldi ári shoý-bıznestegi eń jarqyn jobaǵa aınalǵan báseke negizinen eki kezeńnen turady. Birinshi kezeńde kásibı mamandar 11 atalym boıynsha úsh úmitkerdi irikteıdi. Al 3 shilde kúni jeńimpazdar resmı túrde marapattalady. Bul kúni jankúıerlerdiń qoldaýyna laıyqty otandyq eń úzdik tanymal jandar men óner adamdary qyzyl kilem ústimen júrip ótedi. О́tken jylǵy «Astana jul­dyzy» báıgesiniń úsh atalymy boıynsha laýreat atanǵan «MýzArt» tobynyń ánshisi Meırambek Besbaev bizben áńgimesinde: «О́ner adamdary úshin bul baıqaýdyń alatyn orny erekshe. Bul bizdi shabyttandyrý úshin kórsetilgen úlken qoldaý. Byltyr tórt juldyzdy báıgeni qanjyǵamyzǵa baılasaq, bıyl da básekede baǵymyzdy synaıtyn bolamyz», – deı kelip, qatysýshylarǵa sáttilik tiledi. Al Astana qalasy ákimdigi mádenıet basqarmasynyń basshysy Bolat Majaǵulov, úzdikterdi marapattaıtyn álemdik deńgeıdegi «Gremmı», «World Music Awards», «BRIT EÝORDS» sekildi belgili kásibı baıqaýlar men syılyqtar izimen Qazaqstanda dúnıege kelgen «Astana juldyzy» baıqaýynyń buıyrtsa, sondaı iri dodalar jolymen úlken tabystarǵa jete beretinin tilge tıek etti. BAQ ókilderi ekinshi «Astana juldyzy» báıgesiniń ashylýyn óz kózderimen tamashalap, zańǵar aspannan syıǵa tartylǵan juldyzdyń qujattarymen egjeı-tegjeıli tanysý múmkindigine ıe boldy. Soltústik jarty shardaǵy Arystan shoqjuldyzy tobynan «Astana juldyzyn» aıqyn kórý múmkin edi. Taǵy bir ǵajaby, «Ǵarysh-Jer» halyqaralyq kitapshasynda tirkelgen 14-shi kólemdegi juldyzdy teleskoppen kórýge bolady. Eske sala keteıik, ótken jylǵy «Astana juldyzynda» Qazaqstannyń tanymal ártisteri Roza Rymbaeva, Marjan Arapbaeva, sondaı-aq «MýzArt», «Ulytaý», «Musicola», «KeshYou» toptary men jastardan Álı Oqapov, aǵaıyndy Zadarnovskııler óner kórsetken bolatyn. Al bıylǵy jarysta Astana kóginde kimniń aıy ońynan týyp, juldyzy jar­qy­raǵaly tur? Juldyzdar tek aspanda ǵana emes, jerde de týady... Maqpal TО́REBEK. Sýretterdi túsirgen Erlan OMAROV.