Kollajdy jasaǵan Záýresh Smaǵul, «EQ»
«2022 jyldyń qańtar-jeltoqsan aılary aralyǵynda MÁMS úshin Astana qalasy boıynsha 67,5 mlrd teńge jarna aýdarylǵan. Onyń 37,8 mlrd teńgege jýyǵy – jumys berýshilerdiń aýdarymdary, al jeke kásipkerlerden túsken jarna – 29,7 mlrd teńge (jalpy somanyń 129,1 mln teńgeden astamy biryńǵaı jıyntyq tólem (BJT) boıynsha aýdarylǵan). Mindetti áleýmettik medısınalyq saqtandyrý úshin túsken barlyq jarna aýdarymdary, ıaǵnı jınaqtalǵan qarjy, senimgerlik basqarý týraly jasalǵan kelisimshartqa sáıkes, Ulttyq bankte saqtalady da, medısınalyq qyzmetter aqysyn tóleýge jumsalady. TMKKK jáne MÁMS paketteri boıynsha halyqqa kórsetilgen medısınalyq qyzmetterdiń sapasy men kólemine monıtorıng jasap, teksergennen keıin ǵana Qor jetkizýshilerine tólem júrgiziledi», dep túsindiredi «Áleýmettik medısınalyq saqtandyrý qory» KeAQ Astana qalasy boıynsha fılıalynyń dırektory Nurlybek Qabdyqaparov.
Eske salamyz, 2022 jyldyń 5 qyrkúıeginen bastap 12 aıǵa aldyn ala jarna tóleý arqyly MÁMS júıesine qatysýdyń jańa tetigi iske qosyldy. Buryn medısınalyq saqtandyrýǵa jarnalardy eshqashan tólemegen nemese júıeli túrde tólemegen, sonyń saldarynan saqtandyrý mártebesinen aıyrylǵan derbes tóleýshilerge ony qalpyna keltirý úshin ótkizip alǵan aılarǵa, tipti ótken jylǵa da jarnalardy tóleý qajet edi. Endi olarda balama ádis paıda boldy – jarna aýdarylmaǵan ótken kezeńdi tólemeı-aq, aldaǵy 12 aı úshin tólem jasaý arqyly «saqtandyrylǵan» mártebesin ala alady.
Biraq 12 aıǵa birden tólem jasaýǵa bolmaıdy, óıtkeni júıe ár aı úshin tólemdi bólek oqıdy, sondyqtan ár aıǵa bólek-bólek tóleý kerek.
Jarnalardy tóleý kezinde qatelikter jiberilmegenine kóz jetkizý kerek. Áıtpese, tólem júıege túspeıdi jáne sizge mártebe berilmeıdi. Engizilgen JSN, tólem kezeńiniń jáne tólem engiziletin jyldyń durystyǵyn qaıta tekserińiz.
Eger bir aıda qate jiberilse nemese eki ret tólense, qate tólengen tólemdi «Azamattarǵa arnalǵan úkimet» memlekettik korporasııasyna ótinish jazý arqyly qaıtarýǵa bolady.
MÁMS jarnalaryn ekinshi deńgeıdegi kez kelgen bank, bankterdiń mobıldi qosymshalary, jyldam tólem termınaldary jáne «Qazposhta» fılıaldary arqyly tóleýge bolady.
«Egemen-aqparat»
