«Oblys ákimdikteriniń málimeti boıynsha 2023 jylǵa arnalǵan egis alqaptarynyń boljamdy kólemi 23,2 mln gektardy qurady. Dándi jáne burshaq daqyldarynyń egis alqaptaryn 171,3 myń gektarǵa, qant qyzylshasyn 6,7 myń gektarǵa ulǵaıtý josparda bar. Sondaı-aq kókónis jáne baqsha daqyldarynyń 10,2 myń gektarǵa artýy boljanyp otyr», dedi Erbol Qarashókeev Aýyl sharýashylyǵy mınıstrligi alqasynyń keńeıtilgen otyrysynan keıin.
Onyń aıtýynsha, bıyl kúrish pen maqtadan bólek, birneshe maıly daqyldardy egý kólemi qysqarady.
«Ylǵaldy kóp qajet etetin daqyldarǵa keletin bolsaq, bıyl maqta alqaptaryn ótken jylmen salystyrǵanda 13,8 myń gektarǵa qysqartý josparlandy. Úkimettiń sýdy kóp qajet etetin egistik alqaptaryn qysqartý týraly tapsyrmasyna qaramastan, ótken jylmen salystyrǵanda kúrish alqaptary 9,9 myń gektarǵa artty», dedi mınıstr.
Onyń aıtýynsha, Qyzylorda jáne Túrkistan oblystarynyń ákimdikteri bul máseleni baqylaýda ustaýy qajet. Maıly daqyldar boıynsha da 191 myń gektar alqapty qysqartý josparda bar.
