Prezıdent málimdemesinde: «Májilistiń jáne máslıhattardyń kezekten tys saılaýy – konstıtýsııalyq reformanyń jalǵasy» dep túsindirdi. Rasynda, orny bólek osy organ qyzmeti jańarmaı, azamattyq qoǵamnyń damýy tıisti deńgeıde iske aspaıtyny belgili.
Al azamattyq qoǵamnyń ózi qalyptastyrmaǵan Májilis pen máslıhattar quramynyń bılikke yqpaly da, halyqqa qyzmeti de tolyq óte bermeıtinin tájirıbe kórsetti. Sondyqtan Memleket basshysy Qasym-Jomart Toqaevtyń «Kúshti Prezıdent – yqpaldy Parlament – esep beretin Úkimet» qaǵıdaty boıynsha jańarý jolyna bet burdyq.
Halyq arasynda keıingi jyldary túrli saılaý naýqandarynyń jıi ótip jatqanyn synaýshylar da, ony túsinbeı júrgender de bar. Kerisinshe, saılaý saıyn saıası saýaty men mádenıeti qalyptasyp, azamattyq belsendiligi artyp kele jatqandar da az emes.
Biraq kim-kimniń de aptyqpalyqqa salyp: «О́zgeris osylaı bolady...» degendeı shalt qımyldar men oqys sheshimderden góri parasatty qadamdar kútip otyrǵany anyq. Soǵan qaraǵanda, demokratııalyq ustanymdar baıypty baılam jáne batyl qadammen satylaı joǵarylaǵanda ǵana nátıjeli bolaryna barshanyń kózi jetip otyr.
Jaqynda ǵana ótken Senat saılaýynda birqatar jańa saıası tulǵa mandatqa ıe boldy. Endi kezek – Májilis pen máslıhattardyń jańarýy. Eger osy qadam ońtaıly iske assa, «esep beretin Úkimettiń» qyzmeti de, onyń quramy da aldyńǵy atalǵan eki qurylymnyń yqpalynda bolmaq. Sondyqtan bul jolǵy naýqannyń mańyzyna bárimiz birdeı múddelimiz.
El ishinde osy ýaqytqa deıin daýly máselege aınalyp kele jatqan «Halyq saıası reformalarǵa daıyn emes» jáne «Bılik saıası reformadan qorqady» degen syńarjaq pikirler bar. Eki taraptyń da ýájine kóńil qoısańyz, kókeıge qonymdy sebepterin sanamalap beredi. Biraq ondaǵan jyl boıy osy daýdyń arajigin aıyryp, altyn arqaýyn tabatyn amal bolmady nemese shyn nıettengen tulǵalar tarapynan tıisti talpynys týmady. Áıtpese, bul qısyn qaıshylyǵy osynsha ýaqytqa deıin shıelenispes edi.
Árıne, oǵan eki tarap ta birdeı jaýapty. Bılikten saıası reforma jasaýdy talap etý bir bólek, oǵan qoǵamnyń ózi de aralasyp yqpal etýi taǵy kerek. Eldiń talabymen bul joly bılik alǵa qadam basty. Endigi kezek – jurtymyzdyń jaýapty júrisinde. Tarıhtan taǵylym men tájirıbeni mol jıǵan dana halqymyz osy jolǵy múmkindikterin múlt jibermeıtinine senemin.
Qoǵam óz ishinen laıyq kandıdattaryn iriktep usynyp, saılaýdyń ashyq ári ádil ótýi úshin baıqaýshy bolyp, azamattyq quqyǵyn paıdalanyp daýys berýge qatysýy – «áli saıası reformaǵa daıyn emes» degen teris pikirdi túbegeıli joqqa shyǵarady. Belsendiligimiz qanshalyqty joǵary bolady, sonshalyqty oń ózgeristerge jol ashylatynyn umytpaıyq.
Prezıdent aıtqandaı: «Biz bir el, bir halyq bolyp, ádiletti Qazaqstandy quryp jatyrmyz. Osy jolda túrli syn-qaterdi eńserip, kóptegen mańyzdy mindetti birge atqarýymyz kerek». Endeshe, bılik pen qoǵam birigip, máńgilik memlekettik múdde turǵysynan ortaq mámilege kelýge árqashan ázir bolýymyz kerek.
Berik AHMETOV,
Sh.Esenov atyndaǵy Kaspıı tehnologııalar jáne
ınjınırıng ýnıversıtetiniń prezıdenti
