Saılaý – qoǵamda alańdaýshylyq tanytyp otyrǵan máselelerdi kóterýge múmkindik beredi. Saılaýshylardyń qoldaýyna senim artyp otyrǵan kandıdattar barlyq taraptyń pikiri men múddesin eskerip, halyqtyń ál-aýqatyn jaqsartýdyń joldaryn izdeýi kerek. Joǵary oqý oryndarynyń ǵalymdary men oqytýshylarynda «akademııalyq erkindik» degen túsinik bar. Ol barlyq stýdentterge qarastyrylatyn taqyryp boıynsha suraq qoıýǵa, pikirtalas júrgizýge jáne sol taqyryp boıynsha óz kózqarastaryn jetkizýge múmkindik beredi. Árıne, mundaı dıalog keıde orynsyz nemese jaǵymsyz da bolýy múmkin. Degenmen de ártúrli ıdeıalardy talqylaý múmkindigi ǵylymnyń aqıqatyn ashýǵa kómektesedi.
Aldaǵy saılaýda halyqtyń senimine ıe bolǵan azamattar bılikke kelip, Qazaqstan budan da kúshti ári turaqty, zań men ádilettilikti qatań saqtaıtyn memleket bolatynyna senim mol. Kez kelgen eldiń alǵa qaraı damýy men ekonomıkalyq nyǵaıýy osyndaı faktorlarǵa tikeleı baılanysty, demek bizdiń árqaısysymyzdyń ál-aýqatymyzdyń jaqsy bolýy da osyǵan kelip tireledi.
Meıram BEGENTAEV,
Q.Sátbaev atyndaǵy Qazaq ulttyq tehnıkalyq zertteý ýnıversıtetiniń rektory
