Sarysý aýdandyq polısııa bólimine Jańatas qalasynyń birneshe turǵynynan ártúrli ýaqytta bir mazmundaǵy aryz tústi. Onda olar ózin Lázzat dep tanystyrǵan áıeldiń páter alyp beremin dep senimderine kirip, qarjylaryn ıemdenip ketkeni týraly kórsetken.
Kúdikti áıel 13 adamnyń jalpy kólemi 8 mıllıon teńgeden astam aqshasyn alyp, habarsyz ketken. Ol óziniń ákimdikte jumys isteıtinin aıtqan jáne aýdan ortalyǵynan arzan baǵaǵa kezeksiz páter alyp beremin dep aldaǵan.
Osy derek boıynsha QR QK-niń 190-babynyń 3-bóligi 4-tarmaǵymen (Alaıaqtyq) sotqa deıingi tergep-tekserý amaldary bastaldy.
Bul bapqa sáıkes múlki tárkilenip, úsh jyldan jeti jylǵa deıingi merzimge bas bostandyǵynan aıyrýǵa deıin jaza qarastyrylǵan.
«Polısııa qyzmetkerlerimen jedel-izdestirý sharalaryn júrgizý barysynda 54 jastaǵy M. esimdi eshqaıda jumys istemeıtin Jańatas qalasynyń turǵyny anyqtalyp, ustaldy. Sonymen qatar ol óz atyn Lázzat dep ótirik aıtqany belgili boldy. Qazirgi ýaqytta kúdikti óz kinásin tolyq moıyndap, ýaqytsha ustaý ızolıatoryna qamaýǵa alyndy», dep jazylǵan IIM taratqan habarlamada.
