Is Almatynyń qylmystyq ister jónindegi mamandandyrylǵan aýdanaralyq sotynda qaralyp jatyr, bul osymen besinshi otyrys. Aldyńǵy tyńdaýlarda aıyptaýshy men qorǵaýshy tarapynan jaýap alynǵan edi. Almaty polısııa departamenti ınkassatorǵa Qazaqstan Respýblıkasy Qylmystyq kodeksiniń 99-baby 2-bóliginiń 15-tarmaǵy boıynsha qasaqana kisi óltirdi degen aıyp taqty. Sondaı-aq aıyrbastaý pýnktine shabýyl jasaýǵa qatysqan tórt adamǵa qatysty qylmystyq is qozǵaldy.
Aıyptalýshynyń qorǵaýshysy oqıǵa kezinde oq abaısyzda atylǵan dep, «abaısyzda adam óltirý» babyn talap etip otyr.
Búgingi sot prosesi sot-medısınalyq sarapshy Murat Nurlybaevtan jaýap alýdan bastaldy. Ol marqumnyń denesine zertteý júrgizip, onyń qaıtys bolý sebebin anyqtaǵan. Saraptamanyń qorytyndysy kórsetkendeı, qaza tapqan azamat atylǵan oqtan qaıtys bolǵan. Alaıda marqumnyń denesinen oq tabylmaǵan.
«Oq artynan atylyp, tómennen joǵary boılap, shamamen 6 sm tereńdegen. Jaraqat alǵannan keıin qandaı da bir sharalar qabyldanyp, medısınalyq kómekter kórsetilgen bolýy múmkin. Máıit oqıǵa ornynan máıithanaǵa jetkizilip, eksgýmasııa júrgizildi. Boljam boıynsha, oq qaıtyp shyqqan nemese bireý ony sýyryp alǵan bolýy múmkin», dedi Murat Nurlybaev.
Sot-medısınalyq sarapshysy jaraqat ýaqytyn anyqtaý múmkin emes ekenin aıtty. О́ıtkeni saraptama eksgýmasııadan keıin júrgizilgen.
Sonymen qatar sot prosesinde kýágerlerdiń aıǵaq beınematerıaldary men oqıǵa bolǵan jerdegi beınejazbalar qaraldy.
Buǵan deıin advokat Alma Mýsına óziniń Facebook paraqshasynda 2022 jyldyń 5 qańtarynda saǵat 22:00 shamasynda ınkassatorlar aıyrbastaý pýnktine kelip, ony bes adam tonap jatqanyn kórgeni týraly jazǵan. Onyń aıtýynsha, ınkassatorlar tonaýshylardy óz betinshe ustaýǵa tyrysqan. Polısııaǵa habarlasý múmkin bolmaǵan soń, ustalǵandardyń qujattary men telefondaryn alyp, olardy quqyq qorǵaý organdaryna múmkindiginshe tezirek berý úshin kóligin bazaǵa shyǵarý týraly sheshim qabyldaǵan. Bir sátte urylardyń biri ári jábirlenýshi Nyǵmetjanov qashyp ketýge tyrysqan. Qashyp bara jatyp, súrinip qulaǵan. Ony Baıdýalıev qulaǵan ornynan turǵyzbaq bolǵan kezde abaısyzda oq atylǵan.
Keıin Qalejan Nyǵmetjanovtyń 6 qańtarda qaıtys bolǵany belgili boldy. Al Ilııas Baıdýalıevke qasaqana kisi óltirdi degen aıyp taǵyldy.
Aıtolǵan JÚNISHAN,
L.N. Gýmılev atyndaǵy EUÝ stýdenti
