Jýrnalıstiń jeńisi

Buqaralyq aqparat qural­darynda jýrnalısterdiń alar orny bólek ekeni belgili. So­nymen birge, olardyń jumysyn úılesimdi uıymdastyryp otyratyn redaktorlyq qyzmettiń mańyzy da erekshe. Qazaqstandaǵy aqparat aıdynynda redaktorlyq jumystyń ózindik ereksheligin eskergen syılyq ta bar. Kezinde Almaty oblystyq «Ognı Alataý» gazetin, respýblıkalyq ádebı «Prostor» jýrnalyn tabys­ty basqarǵan belgili qalamger Gennadıı Tolmachev atyndaǵy  jyl saıynǵy syılyq bıyl «2014 jylǵy BAQ-tyń tańdaýly redaktory» atymen berildi. Bıylǵy laýreattar – «Kazahstanskaıa pravda» res­pýblıkalyq gazeti» aksıonerlik qoǵamy basqarmasynyń tóraǵasy Aleksandr Tarakov pen Atyraý­dyń óńirlik «Sahara» gazetiniń bas redaktory Qýandyq Batyrov. Aldyńǵy kúni Almatyda syı­lyqtyń jańa laýreattaryn konkýrs jıýrıiniń tór­aǵa­sy, ultymyzdyń asa kór­nekti aqyny, qoǵam qaı­rat­keri Oljas Súleımenov qut­tyqtady. Bizdiń áriptesimiz – «Ka­zahstanskaıa pravda» respýb­lıkalyq gazeti» aksıonerlik qoǵamy basqarmasynyń tóraǵasy Aleksandr Tarakovtyń eńbegin joǵary baǵalaı kelip, Oljas Omaruly jýrnalıster áýleti bolyp tabylatyn Tarakovtardyń qalamgerlik dástúrge adaldyǵyn atap aıtyp, Aleksandr Iýrevıch­tiń shyǵarmashylyǵyna joǵary baǵa berdi. Jýrnalıstik jolyn «Lenınskaıa smena» gazetinde bastaǵan Aleksandr Tarakov «Kazahstanskaıa pravdada» jıyrma  jyl boıy jemisti jumys istep keledi. Qazaqstan Respýblıkasy Jýrnalıstıka akademııasynyń akademıgi, Qazaqstan Jazýshylar odaǵynyń múshesi bolyp tabylatyn onyń qalamynan kóptegen tamasha kitaptar týǵan. Áriptesimizdi jýrna­lıs­tı­kadaǵy taǵy bir jeńisimen qut­tyq­tap, jańa shyǵarmashylyq tabystar tileımiz. Egemenqazaqstandyqtar.