Sheshimin kútken másele kóp

«Ońtústik óńirdegi sharýalar kóktemgi egis naýqanyna daıyndyq jumysyn bastap ketti. Jaqyn arada ózge aımaqtar da iske kirisedi. Bul rette, olardyń tuqym, janar-jaǵarmaı, tehnıkany jóndeýge qajet qosalqy bólshekter satyp alýy úshin tıisti qarajaty bolǵany mańyzdy. Sondyqtan paıda bolǵan máse­le­lerdi ýaqtyly talqylap, olardy Úkimet deńgeıinde kóterý qa­jet», dedi komıtet tóraǵasy Qaınar Abasov.

Sharýalardyń aıtýynsha, aýyl sharýashylyǵy salasynda uıymdastyrýshylyq jáne zańnamalyq deńgeıdegi máseleler jetip-artylady. Máselen, Batys Qazaqstan oblysyndaǵy sharýa qojalyǵynyń basshysy Serjan Idıatov maıly daqyldar eksportyna kvota jáne lısenzııa engizý josparlanyp otyrǵanyna qynjyldy.

«Bul sheshim múldem durys emes. Eginshiliktiń bul túri óńir sharýalary úshin negizgi ta­bys kózi sanalady. Biz tıisti organ­darǵa Batys Qazaqstan obly­syn­daǵy sharýalardyń atynan ujymdyq hat joldadyq. Osy máseleni Úkimet deńgeıinde kóterýdi suraımyz», dedi ol.

Al Qostanaı oblysyndaǵy Andreı Dvýrechenskıı esimdi kásipker nesıeleýge arnalǵan kepildik bazasy máselesin kóterdi. «Bárinde birdeı kepilge qoıýǵa bolatyn múlik joq. Mysaly, 150 mıllıon teńge nesıe alý úshin 360 mıllıon teńgeniń kepili qajet. Bul aıtarlyqtaı qıyndyq týǵyzady. Sonymen qatar qazir bári qymbattap jatyr. Sharýalardyń shyǵyny artyp barady. Sondyqtan bıyl qajetti qarjylandyrý kólemine qol jetkize almaý qaýpi bar. Eger munyń sheshimi qazir tabylmasa, óńirdiń aýyl sharýashylyǵynda qarjy tapshylyǵy týyndaýy múmkin», dedi ol.

Al Mańǵystaý oblysynyń komıtet múshesi Ońaıbek Ábdilov sý tapshylyǵy bar óńirde qudyq qazýǵa beriletin sýbsıdııany alyp tastaý kózdelip otyrǵanyn atap ótti. Onyń aıtýynsha, bul áreket byltyr qıyn kezeńdi bastan ótkergen aımaqtyń agrosektoryna odan ári zııan kel­tirýi múmkin. Sondaı-aq ol mań­ǵystaýlyq sharýalardy kún pa­nelderimen qamtamasyz etý ju­mysyn qaıta jańǵyrtý qajet ekenin atap ótti.

«Máseleniń kóbisi qazirgi eko­nomıkalyq jaǵdaıǵa baıla­nysty týyndap jatqanyn tú­sinip otyrmyz. Inflıasııa men qymbatshylyqtan eń aldymen sharýalar zardap shegedi. Sondyqtan kóterilgen máse­le­lerdiń eshqaı­sy­sy nazardan tys qalmaıdy. Kelesi oty­rys­qa jaýapty vedom­stvo­lar­dyń ókilderin shaqyrý qajet. Máselen, «Qazaqstan temir joly» kompanııasynyń ókilin jáne taǵy basqalardy shaqyrǵan jón», dep qorytyndylady Qaınar Abasov.