Mınıstr óz sózinde densaýlyq saqtaýdy damytýdyń birneshe basym baǵyttaryn atap ótti. Tarqatyp aıtqanda, bul - medısınalyq-sanıtarııalyq alǵashqy kómek (MSAK) uıymdarynda medısınalyq qyzmetterdiń qoljetimdiligin qamtamasyz etý aýyldyq medısınany damytý, ana men bala densaýlyǵyn saqtaý, dári-dármekpen qamtamasyz etýdi jaqsartý.
«Biz Memleket basshysynyń halyqqa medısınalyq kómek kórsetýdiń tıimdiligin arttyrý jónindegi tapsyrmalary sheńberinde keshendi jumys júrgizip jatyrmyz. Nátıjesinde el boıynsha densaýlyq saqtaýdyń negizgi medısınalyq-demografııalyq kórsetkishteriniń oń dınamıkasy baıqalady. Qaraǵandy oblysy boıynsha jaǵdaı kelesideı: halyqtyń jalpy ólimi 9%-ǵa tómendedi. Sondaı-aq qanaınalym júıesiniń aýrýlarynan bolatyn ólim-jitim kórsetkishteri 37%-ǵa, obyrdan bolatyn ólim-jitim 8%-ǵa, tynys alý aǵzalarynyń aýrýlarynan bolatyn ólim-jitim 37%-ǵa tómendedi, al týberkýlezden bolatyn ólim-jitim 31%-ǵa tómendedi», dep atap ótti Ajar Ǵınııat kezdesý barysynda.
Mınıstrdiń aıtýynsha, 2022 jyly 9 jańa qalalyq emhana men ambýlatorııa, onyń ishinde Qaraǵandy oblysynda 3 emhana paıdalanýǵa berildi.
Mınıstr aýyldyq densaýlyq saqtaýdy damytýdyń basymdyǵyn atap ótip, aýyl turǵyndary úshin profılaktıkalyq qarap-tekserýlerdi engizý týraly baıandady.
«Qaraǵandy oblysynyń 50 myńnan astam aýyl turǵyny zerttelip-qaraldy, 506-ǵa jýyq adam dınamıkalyq baqylaýǵa alyndy, olarda joǵary qan qysymy, qant dıabeti, búırek patologııasy belgileri baıqaldy», dep habarlady mınıstr.
Aıta ketsek, Qaraǵandy oblysynda aýyldyq medısına uıymdarynyń bazasynda 6 dárihana pýnkti ashyldy, al shalǵaıdaǵy aýyldyq pýnktter úshin 7 jyljymaly dárihana pýnkti iske qosyldy.
«2023 jyly ulttyq jobanyń sheńberinde 309 MSAK obektisi, onyń ishinde Qaraǵandy oblysynda 42 obekti salynady», dedi A.Ǵınııat.
Mınıstr profılaktıkalyq qarap-tekserýlerdi qarjylandyrý kólemi 2 esege, medısınalyq konsýltasııalyq-dıagnostıkalyq qyzmetter men ońaltý 1,5 esege, stasıonarlyq kómek 1,2 esege, joǵary tehnologııalyq medısınalyq kómek 2,2 esege kóbeıgenin jáne jaqyn arada 300 tósektik aýrýhana, 200 tósektik perınataldyq ortalyq salý josparlanǵanyn atap ótti.
Gúlshahra SANSYZBAI
